– Når me ikkje kan reisa til det kjekke, flyttar me det kjekke til oss
Koronaviruset legg ein dempar på reiseaktiviteten under årets Ung fritid. Likevel fryktar ikkje arrangørane at det skal verta keisamt.
– Me har vridd hovuda våre og kome fram til eit program eg trass alt tykkjer er ganske bra, seier utekontakt i Kvam herad, Siriann Lillevik.
Ho er leiar i arbeidsgruppa bak Ung fritid. HF tek ein prat med henne saman med ein annan gruppemedlem, dagleg leiar i Grannehjelpa, Sidsel Haugen.
Ung fritid er eit tilbod til born og unge frå 11 til 18 år. Målet er å tilby aktivitetar i ei tid der det elles er lite organisert aktivitet. Ung fritid skal i år gå av stabelen i veke 26, 27 og 33. Programmet til veke 33 er framleis under planlegging.
– Og då kan det henda me får til ein tur ut av heradet, seier Lillevik.
Aktivitetspark og hiphopkurs
Ung fritid byrjar tysdag. Frå tysdag til fredag arrangerer eit eventbyrå frå Bergen ein det arrangørane kaller ein aktivitetspark i Norheimsund idrettshall. Haugen og Lillevik lovar at hallen vert full av aktivitetar som hinderløype, putekrig, strikkløp, fotballbiljard og mykje anna.
– Det vert ikkje så veldig organisert. Dei unge kan koma og vera med på det dei ønskjer å vera med på. Dersom dei ikkje ønskjer å vera med på aktivitetane, kan dei berre vera sosiale med dei andre som er til stades, fortel Haugen.
Fredag kan dei over 15 år gå gratis på kino og sjå filmen Bad Boys for Life.
Tysdag og onsdag i veke 27 vert det hiphop-workshop med Henrik Nordin frå Bergen Dansesenter. Onsdag vert det dessutan familiedag med maritime aktivitetar på Hardanger fartøyvernsenter. Torsdag og fredag vert det kurs i terrengsykling med Gaute Ulltang og Johannes Neteland. Alle som vil delta, må ha med eigen hjelm og sykkel.
Veka vert avslutta med LAN på Kvam ungdomsskule. Det varer frå fredag kveld til laurdag morgon. Deltakarane må ta med utstyr.
Alle aktivitetane er gratis.
– Det kan verta fullt
På grunn av koronaviruset kan ikkje aktivitetsparken i idrettshallen ha fleire enn 50 deltakarar kvar dag. På hiphopkurset er grensa sett til 20 deltakarar. På kurset i terrengsykling er det plass til 12 deltakarar. Kor mange deltakarar som får sleppa inn på LAN, var ikkje klart då HF gjekk i trykken.
Alle som vil vera med på Ung fritid, må melda seg på minst tre dagar før aktiviteten startar. Dette skjer via nettsida til Kvam herad.
– Årsaka er at me må halda oversikt over kven som er til stades på arrangementa, i tilfelle nokon vert smitta av koronaviruset, seier Haugen.
Om fleire enn dei det er plass til, ønskjer å delta, er det førstemann til mølla.
Haugen seier at det framleis er trong for fleire vaksne vakter. Ho oppmodar alle interesserte om å kontakta Grannehjelpa.
