Når hytta ser ut som ei blautkake
Mykje snø kan utgjera ein monaleg trugsel for hytter og andre bygningar viss taket ikkje vert moka.
Det minner Arne Voll, kommunikasjonssjef i Gjensidige, om i eit presseskriv.
Konsekvensane av manglande moking kan verta øydelagde tak og i verste fall bygningar som kollapsar. Sjølv om mange hyttetak er bygde for stor snøtyngd, kan store mengder snø skada takrenner, nedløp, terrassar og gjenstandar på bakken.
Dette gjeld særleg for hytter på fjellet der snømengdene er store og tilsynet ikkje skjer dagleg.
— Ein må hugsa på at sjølv om det regnar i låglandet kjem nedbøren i fjellet ofte som snø, seier Voll.
Forsikringsselskapa får årleg inn fleire hundre saker der snø har skadd hytter og bygningar. Tak som får skade av snø, vert vanlegvis dekt av forsikringa. Men i forsikringsavtalen er den som eig bygningen pålagd å fjerna snø jamleg frå tak, vegger, verandaer og terrassar for å førebyggja og avgrensa skadar.
— Dersom påbodet ikkje vert overhalde, kan det føra med seg at erstatninga for skadane vert redusert, seier Voll.
Han peikar på at om ein sjølv ikkje er i stand til å rydda snøen, må ein få andre til å gjera det.
Han oppmodar om å skaffa seg informasjon om snøtilhøva via lokalkjende eller vêrvarslinga. I mange hytteområde er det folk som tek på seg oppdrag med tilsyn og snørydding.
Det er like viktig å moka snø av andre typar bygningar, seier Voll. Garasjar, driftsbygningar og andre overbygg har ofte ein spinklare takkonstruksjon, og legg det seg mykje snø på taket, er det ekstra viktig å fylgja litt med.
— Ein liten eigeninnsats kan spara mange for ubehagelege overraskingar, seier Voll.
