Nærmar seg slutten for gammal travar
Det er ikkje sikkert brannbilen på Oma får oppleva mange fleire opne dagar på brannstasjonen. Ein ny bil er i kjømda.
Rune Sundfjord, utrykkingsleiar på Oma brannstasjon, fortel at den gamle bilen er frå 1990-talet. Sidan bestillingstida er lang, reknar han med det tek eit par år før den nye bilen er på plass.
– Den nye bilen får større vasstank. Dessutan er den tyngre, har kraftigare motor og vinsj. Det gjer at den fungerer betre når ein må dra bilar for å frigjera skadde etter trafikkulukker. Sjølv om den gamle bilen begynner å trekkja på åra, har den gjort ein god jobb. Det er eg trygg på at den kjem til å gjera i tida før den nye bilen kjem, seier han.
– Har det meste
For å gje folk eit innblikk i kva som er i vente, hadde ein av brannbilane frå Norheimsund teke turen til Oma då det laurdag var open dag på stasjonen. Ifølgje Sundfjord vil den nye Oma-bilen vera relativt lik.
– Vår bil skal til dømes ha firehjulstrekk, det har ikkje denne. Bortsett frå det skal dei vera identiske, fortel han.
Stasjonen på Oma har 12 tilsette. Den dekkjer området frå kommunegrensene til Bjørnafjorden og Kvinnherad til Kvitastein.
– Me har stort sett det same utstyret som dei har i Norheimsund. Skulle me trenga noko dei har som me ikkje har, kjem dei med det, fortel Sundfjord.
Årleg arrangement
Sundfjord fortel at på grunn av koronapandemien er det nokre år sidan sist stasjonen inviterte bygdefolk på besøk.
– No er me i gang att, og me skal prøva å arrangera dette ein gong i året, seier han.
Gjestene fekk spruta med brannslangar, sløkkja brann med brannsløkkingsapparat, prøva hjarte- og lungeredning og fekk høve til å studera utstyret på stasjonen. Den populære brannbamsen Bjørnis var til stades for å underhalda små og store.
