Nærmar seg ny deadline på Evjo

Gule's Mek og Landbruksverkstad AS stilte nyleg Kvam herad spørsmålet om kva som skjer i saka.

Den siste dispensasjonen i rekkja vart gjeven 5. oktober i fjor, men gjeld berre fram til komande årsskifte. Vedtaket romma ein ordre til rådmannen om å avklara med Jan Mo AS korleis tidshorisonten er for flytting av heile eller delar av verksemda til det planlagde næringsområdet ved Skarpen. Dette skulle gjerast før 30. juni, ifylgje vedtaket.

Dette vart ikkje gjort før fristen som fylgje av ein glipp, fortel leiar Heidi E. Ørjansen i eining for plan og byggjesak. Fyrst etter at naboen etterlyste informasjon, tok administrasjonen tak i saka. Administrasjonen har no drøfta internt korleis ein kan løysa arealtrongen til Jan Mo medan ein ventar på det nye næringsområdet.

No er det planlagt eit møte med partane for å drøfta alternativa. Ifylgje Ørjansen har heradet mint Jan Mo, som er leigetakar og brukar av det aktuelle arealet som Martin Vik eig på Evjo, om at verksemda snart må søkja om ny dispensasjon.

I ordskiftet understreka fleire at det må verta slutt på dei mellombelse dispensasjonane. Vedtaket opnar ikkje døra på glytt for framhald. Dei folkevalde slo i vedtaket fast at transportverksemda må søkja om mellombels dispensasjon på Skarpen dersom ikkje reguleringsplanen er ferdig når dispensasjonen går ut.

Ei løysing med mellombels dispensasjon på Skarpen er lite aktuell, seier Ørjansen til HF. Årsaka er at ymse utgreiingar må på plass før reguleringsplanen kan godkjennast. Dessutan har Kvam herad enno ikkje hand om grunnen.

Kvam herad har tinga turvande grunngranskingar på Skarpen. Når planen er vedteken, må arkeologiske granskingar gjennomførast. Dessutan må altså tingingane om kjøp av grunnen sluttførast.

Rådmannen tilrådde å gje dispensasjon i fem år i fjor. Lokalpolitikarane greip inn og reduserte til eitt år.

Heidi E. Ørjansen er ikkje lenger Sp-politikar, slik ein kanskje kunne tru etter å ha lese ein tidlegare versjon av denne artikkelen. Ho representerte tidlegare Sp i heradsstyret, men gjekk ut av maktorganet då ho vart leiar for eining for plan og byggjesak i Kvam herad. Me ber om orsaking for slurvet. Red.