Næringshage kan få 35 millionar kroner

Pengane kjem frå staten til fylkeskommunen og går vidare til Siva – Selskapet for industrivekst SF, som driv programmet. Summen plasserer næringshagen på det høgaste stønadsnivået.

– Å verta plassert på toppnivået gjer at me kan utvida vår rådgjevingshjelp til fleire verksemder i vår region. Hardanger og Voss Næringshage skal vera ei drivkraft for utvikling i vår region, og no er me særs glade for å sikra dette arbeidet dei neste ti åra, seier dagleg leiar Michael Knüsel i ei pressemelding.

Slo seg saman

Næringshagane på Voss og i Hardanger vart slegne saman 1. januar.

Hovudutval for næring i Vestland fylkeskommune vedtok 10. november at Hardanger og Voss Næringshage skulle få stønaden. I tillegg går fylkeskommunen inn med prosjektmidlar for at næringshagen skal kunna tilby tenester i heile regionen, der Eidfjord, Kvam, Kvinnherad, Ullensvang, Ulvik og Voss er inkludert.

– Dette vil fremja og styrkja samarbeidet i regionen, noko som kjem heile næringslivet og regionen til gode, seier Knüsel.

Gjennom Siva får næringshagen årlege utviklingsressursar, slik at han kan tilby rimelege og lokale rådgjevingstenester i distrikta. Stønaden frå Siva går indirekte til vekstbedrifter, såkalla målbedrifter, som vert valde ut etter visse krav i næringshagen. Dei får avtale om rabatterte tenester som skal hjelpa dei til å veksa og utvikla seg. Ei målbedrift må ha potensial og vilje til vekst og utvikling for at næringshagen skal kunna hjelpa.

Meir av det same

Leiar for avdelinga i Hardanger, Sigmund Vereide, seier tilskotet ikkje vil endra mykje på kva næringshagen gjer, men nedslagsfeltet vert større. Under den nye ordninga med tilskot i ti år vert næringshagen vurdert annakvart år, og kan verta kasta ut.

Vereide seier eit nytt program er på trappene.

– Me har fått pengar til å jobba med Ullensvang og Kvinnherad, så det vert artig. Me har hatt eit svært godt samarbeid med Ullensvang Næringshage, som allereie er med på eit fellesprosjekt, seier Vereide.

Hardanger og Voss Næringshage skal røkta målbedrifter både i Ullensvang og Ulvik. Næringshagen i Hardanger AS har dei siste tre åra arbeidd på eit prosjekt med 30 nye målbedrifter.

– No kan me halda fram. Det vert spanande å sjå korleis me riggar det nye samarbeidet. Det som er nytt, er at også Kvinnherad vert med. Me har to målbedrifter der. No kan me skreddersy ei god satsing, både gjennom å halda fram med verksemdene me har og med å ekspandera i Kvinnherad og Ullensvang. Det vert veldig kjekt, seier Vereide.

Hardanger og Voss Næringshage har til saman om lag 110 målbedrifter i porteføljen.

Får kraftig rabatt

H2 Hardanger AS, Mathuset i Hardanger AS og Hardanger Bygdeysteri AS er døme på verksemder som næringshagen er med og hjelper.

– Me har så mange at eg ikkje klarar å lista opp alle, seier Vereide.

Gjennom næringshagen får bedriftene tilgang til kompetanse og hjelp til ein annan pris enn dei elles ville ha gjort. Dei fleste får 75 prosent rabatt.

For å hjelpa bedrifter i Kvinnherad, får næringshagen ekstra pengar.

– Det er veldig kjekt, utruleg spanande. Me får pengar frå Vestland fylkeskommune for å bruka i Kvinnherad og Ullensvang. Summen er ikkje bestemt, men det er ei ramme på opptil 2,1 millionar kroner. Det skal avklarast når prosjektet er ferdig utgreidd.

Næringshagen har i alt 13 tilsette med brei kompetanse.

– Me er meir robuste enn tidlegare. Det er éin positiv ting med fusjonen med Voss. Me har etter kvart svært mange års erfaring med rådgjeving, både frå næringshageprogram og tidlegare jobbar, seier Vereide.