Frå venstre: Gunnar Dalseth i Herand Bygdelag, Bergljot Eiken Berg og Audun Berg la fram planane for den framtidige drifta av nærbutikken i Herand. – Det å eiga og driva butikken med størst grad av lokale krefter er ein føresetnad for å lukkast, sa Bergljot.

Nærbutikk treng lokale med på laget: – Me er frimodige og spør igjen

Lokale bidragsytarar vil spela ei viktig rolle for å få i gang att drifta av nærbutikken i Herand.

Mari Ulvund
Journalist
Publisert Sist oppdatert

Det kom fram i eit bygdemøte i kulturhuset i Herand laurdag 14. januar. Der presenterte Bergljot Eiken Berg og Audun Berg, som skal eiga og driva nærbutikken, planane for den framtidige drifta av Herand Handel AS. Saman med dei var Gunnar Dalseth, som er kontaktperson for Herand Bygdelag.

– Langt betre utgangspunkt

I møtet vart private aktørar inviterte til å bidra økonomisk. Ifylgje Dalseth er vona å få inn lokal kapital på kring 600.000 kroner. I tillegg vil Berg bidra med 500.000 kroner og Herand Bygdelag med 400.000 kroner.

– Med ei samla finansiering på 1,5 millionar kroner vil utgangspunktet vera langt betre enn sist butikken vart opna, sa Dalseth.

– Me trur at dette skal gå bra, og at det er nok kundegrunnlag gjennom året til å kunna driva butikk på ein fornuftig og berekraftig måte, sa Gunnar Dalseth i Herand Bygdelag i folkemøtet i Herand Kulturhus.

Då Herand Lanhandleri opna våren 2018, var det mange i lokalsamfunnet som skaut inn kapital. Sjølv om det i fjor haust kom fram at butikken var i ein utfordrande økonomisk situasjon, vonar Dalseth at folk ikkje er redde for å bidra denne gongen òg.

Han understreka at dei som kjøpte aksjar sist, bidrog med pengar som vart godt utnytta.

– Sjølv om dei kanskje føler at det var tapte pengar, skal dei vera klar over at det som vart betalt, gjekk med til å driva butikken. Dermed er me frimodige og spør igjen folk om å bidra, sa han.

Undersøkjer tenester

Ifylgje Audun Berg tek ikkje ekteparet sikte på å driva butikken vidare på same måte som før. Han meiner det er rom for forbetringar, og at det lyt gjerast fleire investeringar for å kunna driva nærbutikken på ein effektiv måte.

Audun viste mellom anna til at teknisk utstyr lyt oppgraderast, og at det er viktig å tenkja på energiøkonomisering.

– Me må gjera det me kan for å få ned straumkostnadene. Det lèt seg gjera med litt teknisk utstyr. Me har eit godt utgangspunkt for å lukkast, sa han.

Planen til familien Berg er at Bergljot skal flytta til Herand så snart ho har høve. Ektemann Audun (i midten) og yngstesonen, Jakob, flyttar etter til sommaren, opplyste dei.

Panteautomat, post i butikk og medisinutsal er nokre av tenestene ein har sett nærare på. Bergljot opplyste at ho har vore i kontakt med mellom andre Posten Norge AS og nokre av apoteka i Kvam og Ullensvang for å skaffa informasjon om alternative løysingar. Førebels er det uklart kva som er mogleg å få til, ifylgje den nye daglege leiaren.

Ekteparet har som mål å skapa ein open, inkluderande og framtidsretta butikk, sa Bergljot. I tillegg ynskjer ekteparet å bidra til at Herand skal vera ein naturleg stoppestad for turistar – både for dei som kjem køyrande og dei som kjem med båt.

Stig Otto Mjelde minte dei frammøtte i kulturhuset i Herand om at dersom dei vil ha ein butikk i bygda, så lyt dei nytta han mest mogleg.

– Må bruka han meir!

Stig Otto Mjelde var ein av dei frammøtte i salen. Han tok opp det han som ifylgje han var «elefanten i rommet» – som er bruken av butikken.

– Det er eit fåtal menneske i bygda. Det er viktig at me som er her, støttar prosjektet. Me kan ikkje berre køyra til Jondal for å handla. Me må bruka butikken langt meir enn me har gjort tidlegare, sa Mjelde.

Audun Berg la til at målet til butikkeigarane er å leggja til rette for at lokale ikkje skal få ein god grunn til å handla andre stader.

– Me skal prøva å få til dei tenestene det er mogleg å få til. Det er nokre avgrensingar, men med litt kreativitet er det mykje som kan ordnast, sa han.

Christian Tolås ynskjer at nærbutikken i Herand skal tilby meir enn berre daglegvarer. – Hamrar, skruar og liknande er varer som held seg i årevis og kan ha gode avansar, sa han.

Christian Tolås la fram eit forslag om mellom anna å ta inn forskjellige jarnvarer. Han påpeika at det er tungvint å reisa til nabobygda dersom ein treng noko lite, som skruar eller liknande.

Det at nærbutikken har vore, og vil halda fram med å vera, ein del av Snarkjøp Gruppen AS, gjer at butikken kan styra sortimentet meir enn butikkar i dei store kjedene. Dimed kan det ifylgje Audun Berg med tida verta aktuelt å ta inn forskjellige varer, til dømes båt- og fiskeutstyr.

– Men me må byrja ein plass. Fyrst må me få daglegvarebiten opp og gå, sa han.

Om lag åtti personar møtte opp for å høyra om framtidsplanane til nærbutikken i Herand laurdag 14. januar.

– Tøff framdriftsplan

Ekteparet Berg vil vera til stades i butikken i kjernetida. Dessutan vil dei halda på den sjølvbetente kassen, som syrgjer for at butikken vil halda på dei utvida opningstidene han har hatt tidlegare.

Bergljot omtala framdriftsplanen som tøff. Med eit mål om å opna butikken før påske er det mykje som skal ordnast på kort tid. Inne i lokalet skal reolar og utstyr flyttast på.

Noko av plassen inne er tenkt nytta som kaffikrok, slik at dei som er innom, kan nyta ein kopp kaffi eller kakao og nysteikte bollar, sa Bergljot. Utbetring av uteområdet – til dømes å få på plass ei sofagruppe – er også ynskjeleg å få til, sa den nye daglege leiaren.

Bergljot Eiken Berg vert ny dagleg leiar i Herand Handel AS. Ho er oppvaksen i Herand. – Eg søv godt om nettene, men av og til vaknar eg og tenkjer: «Kva har me gjort?» Men me har tru på dette, sa ho om valet om å flytta tilbake til bygda og driva butikk.
økonomi nyhende mat og næringsmiddel herand bygdelag herand arbeidsliv varehandel
Laga med Labrador CMS