Naboar klaga – måtte flytta festivalklubb

Under eit intervju med HF midt på dagen onsdag, berre to dagar før festivalen startar, kom det fram at «Klubb Løo» må flyttast frå Meieritomta. Grunnen er naboar som har klaga etter at eit nabovarsel vart sendt 21. juni.

Det er bebuarar i leilegheitskomplekset Hardanger Brygge som ikkje er nøgde med plasseringa av klubben. I eit skriv frå styret i Hardanger Brygge 2 til Kvam herad står det at plasseringa vekkjer oppsikt hjå fleire bebuarar, då ein del av leilegheitene har soveromsvindauge vende mot klubbområdet.

Tidlegare år har festivalen avslutta utandørs klokka 23, som også er tida då det skal vera offentleg ro. Denne ordninga har vore leveleg for dei fleste, ifylgje brevet.

– Å skulla ha eit klubblokale på nabotomta til klokka 02.30, fylgt av «utslusing» og taxikøar, er ei heilt anna sak, skriv styret.

Kan festivalen fråvika lova om offentleg ro? spør naboane.

– Klart over anbefalte verdiar

Kommuneoverlege Svein Ivar Fylkesnes fekk innspelet frå naboane førre fredag. Som tilsynsmakt er det hans ansvar å vurdera om arrangementet er innanfor gjeldande retningsliner for utandørsarrangement. Kvam herad har ikkje eigne retningsliner for dette, og har i hovudsak nytta ein rettleiar frå Helsedirektoratet i vurderinga. Det opplyser Bente Valland Tolo, juridisk rådgjevar i Kvam herad.

Ho skriv at rettleiaren gjev anbefalte grenseverdiar for lyd i ulike tidsrom. Kort oppsummert vurderte kommuneoverlegen det slik at arrangementa var klart over dei anbefalte verdiane, både for dei næraste naboane og truleg også for ein større krins av bustader i Norheimsund. Han fann det difor naudsynt å varsla om pålegg om retting eller stans.

Tolo skriv at heradet har hatt god dialog med festivalleiinga, og at begge partar har vore samarbeidsvillige og løysingsorienterte.

Kasta seg rundt

Onsdag kveld delte Bygdalarm på Facebook-sida si at klubben vert flytta til den gamle brannstasjonen i Grovagjelet. Festivalsjef Ida Sørheim seier at festivalen – i og med at det har vore klubb utandørs i Nistagato tidlegare – rekna med at det skulle gå greitt å vera på Meieritomta.

– Me snakka med både kommunen og naudetatar på førehand. Det vart ikkje sagt noko om at det ikkje skulle gå, seier Sørheim.

Grunnen til at nabovarselet ikkje kom før halvanna veke før arrangementet, er at ikkje alt var på plass før, opplyser Sørheim, som seier festivalen tek det til seg. Varselet skulle vore sendt mykje før, seier ho.

Sjølv om klubben er flytta, har festivalsjefen tru på eit vellukka arrangement. Frivillige har kasta seg rundt og måla nokre veggar, og ein bar er bygd, for å nemna noko.

– Lokalet er trygt

Brannsjef Torleif Ones seier at han har gått gjennom og vurdert lokalet saman med Bygdalarm. Plassen har tilstrekkeleg med naudutgangar, og festivalen ordnar provisoriske tiltak der det trengst, seier Ones.

Fyrst var det snakk om å bruka fleire garasjar, men no er det bestemt at det vert teke i bruk berre éin garasje. Talet på personar, som i utgangspunktet var 550 personar, vert noko redusert, opplyser Ones.

Det er torsdag ettermiddag lite dokumentasjon av sjølve flyttinga å finna. Brannsjefen opplyser at Bygdalarm skal gje heradet ein skriftleg plan for arrangementet, og at heradet kjem til å sjekka at alt er på plass før arrangementet startar fredag kveld.

Det har ikkje vore arrangert liknande arrangement i bygget før, men brannsjefen trur det skal gå bra. Døra vert brukt som inngang, og skulle det skje noko, kan porten opnast både med og utan straum. Dessutan er det to andre naudutgangar tilgjengelege, fortel Ones.

Støy høyrer med

Fristen for å søkja om skjenkeløyve er 14 dagar før arrangementet. Då HF stilte spørsmål om eit eventuelt nytt skjenkeløyve var på plass, svara skjenkekontrollør Nils Anders Bolstad at flyttinga berre endrar arealet i skjenkeløyvet som allereie er gjeve.

– Fristen på 14 dagar er for at heradet og politiet skal ha tid til å vurdera konsept, risikoplanar og vakthald. Her er det berre arealet som er endra, og ei ny risikovurdering for brannstasjonen. Den er godkjend av kommunen, skriv Bolstad.

– Korleis vurderte de offentleg ro då skjenkeløyvet vart gjeve?

– Me styrer alltid etter dei alkoholpolitiske retningslinene. Dei seier ingenting om dette, så det må politiet seia noko om. Me kontakta politiet og vurderte det fram og tilbake saman med dei, seier Bolstad.

Kort sagt meiner politiet at om ein bur i sentrum, lyt ein også leva med mellom anna støy.

– Me kom fram til at dette er ein årleg festival som er godt annonsert, og at dei som ikkje likar det, har god tid til å finna ei alternativ løysing, seier Bolstad.

Terje Sperrevik, politistasjonssjef ved Kvam politistasjon, stadfestar vurderingane. Han seier at både på Tysnesfest og andre arrangement vert det akseptert eit visst støynivå utover ordinære avgrensingar. Han oppfattar arrangementet som positivt for samfunnet.