Mykje snø på fonna – måtte stenga vegen

Dagleg leiar Michael Iversen i Visitfonna AS fortel at han akkurat kom seg opp til skisenteret sjølv, med firehjulstrekk og vinterdekk. Ullensvang kommune skulle brøyta vegen, men ein såg snart at snøen la seg raskt att. Det snør ned til Hestadalen, som ligg kring 800 meter over havet.

– Me klarar ikkje å halda vegen rein gjennom dagen, og folk har sommardekk på bilane. Me tek ikkje sjansen, seier Iversen.

– Pudderkøyring til månen

Ved foten av skitrekket er det mykje snø, litt vind og ei minusgrad. Også trekket held stengt i dag. Det skulle komma ein god del gjester fredag, men dei kjem att i morgon, seier Iversen.

– Me har store mengder nedbør i form av kvitt gull. I morgon er det meldt sol og kanonvêr, så då vert det pudderkøyring herfrå til månen.

Snøen som fell no, er ikkje den beste snøen, fordi han smeltar raskt, seier Iversen. Men det er uansett fint med ny snø. I fjor på same tid var det 15 centimeter nysnø. No er talet 30.

Proffane kjem

Iversen ser positivt på sesongen vidare. I juli er det mest fritidsgjester og ei gruppe som arrangerer sin eigen vesle treningsleir. Frå midten av juli av har tingingane byrja å komma inn frå utanlandske proffar. Lag i europacupen og verdscupen kjem til fonna for å trena.

I august er det ein auke i norske lag samanlikna med fjoråret. Både herre- og damelandslaget i verdscupen, pluss klubbar frå heile landet, skal komma.

– Dei syntest det var så gøy her førre gong, og ville tilbake. Det er gode treningstilhøve, bra snø og ein fin atmosfære, seier Iversen.