– Mykje påverkar navigering

Ein av dei som forklarte seg i retten førre veke, var navigatør, skipper og overstyrmann Michael Eek, som var henta inn som sakkunnig av saksøkjarane. Dei meiner at det er korkje trygt, forsvarleg eller praktisk mogleg å manøvrera med båt i Skutevik etter at båtanlegget vart bygt.

— Problemet når ein skal uttala seg om dette som sakkunnig, er at det er vanskeleg å seia at slik og slik er det. Det er mykje som påverkar navigeringa. Det kan mellom anna vera type propell, type ror, kor djup båten er og kor stort overbygg båten har, sa Eek i retten.

I mars i fjor laga han ein rapport om dei navigasjonsmessige tilhøva i Skutevik. Det finst ingen forskrifter eller anbefalingar om kor mykje plass ein båt treng for å manøvrera trygt. For å ha noko å visa til, drog Eek fram ein uttale frå Bergen Havnevesen i samband med ei plansak på Nordre Nøstekai i Bergen.

— Det er ikkje ein menneskerett å ha båtplass i Tørvikbygd

To båtlengder

Uttalen handlar om kor stor plass utrykkingsfartøyet M/S «Sjøbrand» treng for å kunna manøvrera trygt inn og ut av båthuset ved Nordre Nøstekai. Båten er svært lett å styra og kan ifylgje Eek «snu på ein femøring». Bergen Havnevesen meiner likevel at fartøyet treng eit uhindra manøvreringsrom på kring to gonger eiga lengd for å få ei trygg innsegling.

— Etter mitt skjøn er det ikkje urimeleg å tenkja at to båtlengder er eit minimum for trygg manøvrering, sa Eek.

— Kva med båtane i båsane i båthamna? Kva område treng dei å manøvrera på? spurde advokat Bernt Jacob Pettersen for saksøkjarane.

— Eg meiner at om du har to båtlengder, er du innanfor. Det er mi personlege erfaring. Eg har ein 25 fots båt som ligg i bås. Båten går ikkje særleg djupt og har stort hus. Når det blæs, må eg bakka ut nesten to båtlengder, og då har eg baupropell og kraftig påhengs, svara Eek.

Ikkje einige

Sakkunnig vitne for båtlaget, Thorvald Haarberg, var ikkje einig. Haarberg er utdanna skipsingeniør og ansvarleg for Bergen Båtskole, og har ifylgje dokument presenterte i retten omfattande erfaring med prosjektering av flytebryggjeanlegg.

Haarberg kunne ikkje forstå vurderinga til Eek, og meinte at M/S «Sjøbrand» som utrykkingsfartøy må kunna gå inn og ut av båthuset også om det blæs orkan.

— Ein går korkje til eller frå kai med ein fritidsbåt i orkan, sa Haarberg.

— Når eit flytebryggjeanlegg vert prosjektert, kva er det normalt å leggja til grunn som plass for naudsynt navigering? spurde båtlagsadvokat Nils Egil Tangedal i Advokatfirmaet Judicium DA.

— Det er veldig avhengig av stad, men det er langt mindre enn kva ein skulle tru, svara Haarberg.

Han viste til andre flytebryggjer i Vestland med langt mindre enn to båtlengders manøvreringsrom.

— Sjå til dømes på Bergen Seilforening. Der dei største båtane ligg, er avstanden om lag 13 meter. Og der ligg båtar som er 13 meter lange. Dei manøvrerer flott inn og ut der, sa Haarberg.

— Anlegget er ganske ruvande

Dyrt å flytta

Fleire av bøyene til saksøkjarane ligg i dag tett på båtanlegget. Advokat Tangedal spurde Haarberg om det er noko i vegen for å flytta bøyene nærare land.

— Eg har full forståing for at dei ligg der dei ligg i dag, med tanke på at det ikkje var nokon bølgjedempar tidlegare og at det har vore ope inn. Ubeskytta må båtane vera eit stykke frå land. No når du har ein bølgjedempar utanfor, og du får eit heilt anna bølgjemønster, kan nok avstanden reduserast betrakteleg, sa Haarberg.

Dersom båtlaget vert nøydd å fjerna båthamna, kan det verta dyrt. Ifylgje Haarberg kan ei eventuell flytting kosta mellom 0,75 og 1 million kroner.

— Har båtanlegget gjenbruksverdi? spurde advokat Tangedal.

— Eit fullgodt anlegg vil ein kunna selja. Lat oss seia at ein får 20–25 prosent under ny pris. Anlegget kosta vel rundt seks millionar kroner, svara Haarberg.