MS «Rover»: Varslar mogeleg søksmål

17. juli var det seks månader sidan båten sokk ved kaien ved Hardanger Byggsenter og Yamaha Hardanger i Norheimsund. Og der, på sjøbotnen, har fartøyet lege på skakke sidan.

Kvam herad var rask med å krevja fartøyet fjerna og truga med pålegg. Sidan har tempoet i saka roa seg. Eigaren, Nordlys - Kystforening, har ikkje sjølv sytt for å få båten bort.

Sa frå seg ansvar

Før sommaren sa dei involverte forsikringsselskapa – Alandia Marine Insurance Entrepreneurs og Rogaland Sjøtrygdelag Gjensidig – frå seg ansvaret for å heva han.

Kvam herad meiner at selskapa gjennom forsikringa har ei kontraktsrettsleg plikt til å ta seg av fartøyet, og viser til at Rogaland Sjøtrygdelag i februar skriftleg tok på seg å heva båten.

– Dette har vore utgangspunktet Kvam herad har jobba ut frå, skreiv rådmannen i eit brev til forsikringsselskapet i juni.

Ho synest at forsikringsselskapet har handtert saka på ein måte som er «miljømessig svært negativ», i og med at båten framleis ligg på sjøbotnen.

Rådmannen bad i brevet om eit møte med forsikringsselskapa for å drøfta eit økonomisk samarbeid om saka. Om ikkje heradet høyrer meir, «vert neste steg for Kvam herad å sende varsel om søksmål», skreiv rådmannen.

– Ikkje vårt bord

Alandia Marine Insurance Entrepreneurs svara i midten av juli at lovnaden frå RS om heving i vinter var basert på mangelfull informasjon. Sidan skal det ha vist seg at forsikringa likevel ikkje dekkjer eit slikt forlis.

– Korkje RS eller Alandia pliktar etter forsikringsavtalen å assistera med å fjerna fartøyet, skriv Jenny Appel i Alandia Marine Insurance Entrepreneurs til Kvam herad.

– Kvam herad må handtera fjerninga, saman med eigaren, skriv Appel, som ber om orsaking for at handteringa av saka har drege ut prosessen og påført Kvam herad ekstra kostnader med mellom anna tilsyn.

Ho oppmodar heradet om å heva båten og heller fremja eit krav til forsikringsselskapa i ettertid, dersom heradet framleis meiner at dei har plikter i saka.

HF har freista kontakta styreleiar Hugo Jørgensen i Nordlys - Kystforening via telefon og tekstmelding for å få kommentarar til saka, men utan hell.

Ber om tilbod

Kvam herad hyra i sommar Uvs Vest AS til å filma båten under vassoverflata. Målet var å sjå etter synlege skadar, vurdera mogelegheita for å trekkja stroppar rundt båten, og studera botntilhøva kring han.

1. august bad heradet om pristilbod på heving av båten og levering til Norscrap West på Hanøytangen. Fristen for å gje tilbod er 23. august. Måndag 12. august var tilbydarane på synfaring ved båten saman med Kvam brann og redning.

Branninspektør og sakshandsamar Malin Namdal i Kvam brann og redning opplyser at heradet kan krevja kostnaden dekt i ettertid av eigaren av båten, Nordlys - Kystforening. Ho utelukkar ikkje at andre enn eigaren kan vera part i saka, men heradet har etter vurderingar av saka i lys av ureiningslova og hamne- og farvasslova kome til at eigaren er ansvarleg. Ho kunne i førre veke ikkje kommentera om Kvam herad vil gå til søksmål mot forsikringsselskapa.

Eigaren vart nyleg varsla om at heradet vil fjerna båten og krevja utgiftene dekte i ettertid, i tråd med eit vedtak frå så langt tilbake som februar.