Møttest over eit brett
For dei som ønskjer brikker og brett i staden for ein skjerm, kan sjakktreffa til Kvam sjakklubb vera eit godt alternativ.
Det var inga folkevandring til Thon Hotel Sandven då Kvam Sjakklubb måndag inviterte til årets første sjakktreff for ungdomar og vaksne. I tillegg til Roar Neteland, som hadde ansvaret for arrangementet, møtte tre personar opp. To av dei var debutantar på sjakktreffa. Begge nykomarane hadde trassa kulda og glatte vegar og reist langt: Per Asle Solberg frå Strandebarm og Eirik Gluppe Steinstø frå Ålvik.
– Måtte sjekkar nivået
Både Solberg og Steinstø fortel at dei tilfeldig kom over annonsar for arrangementet og bestemde seg for å stikka innom.
Steinstø fortel at sjakkinteressa hans har vakna etter å ha lege brakk ei stund.
– Eg har byrja spela litt på nett att, men det er noko eige med det å bruka hendene og kjenna på brikkene. Det er annleis enn å glo på pc-en. Dessutan var eg nysgjerrig på nivået til dei som møter på slike treff, seier han.
– Kva gjer sjakk interessant?
– Sjakk er ein tankesport, og eg likar å bryna hovudet. Spelet er veldig utfordrande, og det er alltid noko nytt å læra.
– Open for forslag
Neteland fortel at planen er å invitera til sjakktreff for ungdom og vaksne annankvar måndag.
– Kjem det éin person utanom meg, er planen å arrangera, seier han.
Neteland tek gjerne imot forslag til innhald.
– Om folk berre vil spela sjakk, gjer me det. Om nokon ønskjer å diskutera sjakkteori eller øva på opningar, gjer me det, seier han.
Det er ikkje eit krav at ein faktisk kan spelet.
– Om nokon er heilt grøne, skal me læra dei å spela.
Treffa har korkje ei øvre eller ei nedre aldersgrense.
– Dei er meint for folk frå 12 år og oppover, men skikkeleg motiverte personar under 12 er sjølvsagt velkomne, seier Neteland.
Store og små
Gøril Kjosås er leiar i Kvam Sjakklubb. Ho fortel at klubben også arrangerer sjakk for born i lokala til skulefritidsordninga i Øystese onsdagar.
– I 2024 har klubben som mål å få til stabile grupper både i barnesjakken og vaksensjakken, seier ho.
Sjakklubben har førebels korkje kontingent eller registrerte medlemer. Dei som ønskjer å gå på treffa, kan berre møta opp.
Kvan Sjakklubb er heller ikkje medlem i Norges Sjakkforbund.
– Skulle me ha meldt oss inn, måtte me hatt krav om innmelding og medlemslister. Klubben vart stifta i 2022 og er framleis ganske fersk. No i starten ønskjer me at treffa våre skal vera lågterskeltilbod der det berre er å møta opp, seier Kjosås.
Sjakk i Jondal
I Jondal finst det ein uformell sjakklubb. Ifølgje primus motor Sverre Andreas Stakkestad, består klubben berre av ei Facebook-gruppe. Stakkestad fortel at målet er å arrangera sjakktreff annankvar måndag. Helst den måndagen ingenting skjer i Kvam.
– På den måten får sjakkinteresserte eit tilbod på ei side av fjorden kvar måndag, seier han.
Håpet er å få drege det heile i gang februar.
– Me hadde nokre treff i fjor. Interessa var ikkje alltid like stor. Tidlegare har me vore på Hardanger House. Sjølv om eg ikkje har snakka med hotellet, reknar eg med me får halda fram der. Om ikkje, er det andre aktuelle lokale, seier han.
