Møttest i retten: – Eg forstår ikkje at ho kan hevda det

For INP har hausten vore prega av mykje intern strid, særleg i Vestland.

I haust forsøkte sentralstyret i partiet å avvikla fylkesstyret i Vestland, og kasta ut sentrale medlemmar frå partiet. Mellom dei er leiar Thomas Hellevang og nestleiar Bjarte Helland. Helland sit både i heradsstyret i Kvam og i fylkestinget.

Hellevang og Helland har nekta å godta partileiinga si avgjerd, og meiner den er illegitim. Dei har derfor halde fram med å styra Vestland INP.

No har sentralstyret i partiet saksøkt dei tidlegare medlemmane for å få kontroll over fylkeslaget, og for å hindra at dei bruker pengane som er tilknytt dette.

Det skriv Bergensavisen.

Onsdag møttest partane i retten.

– Brukt fem år på å bygga

Partileiinga har fleire krav, skriv BA:

• At inntil éin million kroner blir beslaglagde frå fylkeslaget

• At dei får tilgang til kontoane til fylkeslaget i sosiale medium

• At dei ekskluderte medlemmane sluttar å nytta partinamnet

– At dei fortset å driva vidare, skaper frustrasjon og sinne, sa INP-sentralstyremedlem Christin Gerner Mathisen i retten.

– Dei prøver å riva ned partiet, og no er det fleire og fleire som melder seg ut, skal ho ifølge BA ha sagt.

Bjarte Helland var sjølv ikkje til stades i retten, ettersom han sat i fylkestingsmøte. Men han reagerer på kommentarane til Mathisen.

– Eg forstår ikkje at ho kan hevda det, når eg har brukt fem år av livet mitt på å bygga dette partiet. Slik me ser det, er det partileiinga som riv ned partiet ved å ta udemokratiske avgjerder, seier han til HF.

– Samstundes sit du i heradsstyret i Kvam. Er det vanskeleg å halda fokus?

– Eg har folk som tar seg av den juridiske biten, medan eg fokuserer på det politiske. Eg er folkevald, og det er mitt ansvar.

Har brukt 100.000

Dei to partane er heilt ueinige om kva som ligg til grunn for konflikten. Dei ekskluderte medlemmane meiner det dreier seg om ein maktkamp.

Thomas Hellevang seier at partileiinga ekskluderer alle medlemmar som ikkje går i takt med leiinga.

– Det er ikkje berre meg. Folk blir ekskluderte i heile landet. Det er fleire berre denne veka, seier han, ifølge BA.

Partileiinga i INP meiner derimot at prosessen som enda med eksklusjonen, starta med ei rekke varsel mot leiinga i fylkeslaget i Vestland.

For å unngå ein eskalerande konflikt, blei Hellevang og Helland suspenderte av sentralstyret. Sidan er det danna eit mellombels fylkesstyre.

Det avsette styret i Vestland INP meiner framleis at det er det einaste legitime og demokratisk valde fylkesstyret, og nektar å gi frå seg kontoane tilknytte partiet.

Det avsette styret har også vedtatt å bruka 100.000 kroner frå partikassen til å dekka utgifter med advokat i saka.