Motparten fekk laga saksgrunnlag: – Dugnad
Ei samanlikning av kostnadene i Hardangerbadet med andre anlegg som er del av sakspapira, er produsert av den private forhandlingsparten.
Normsamanlikninga – på dårlegare norsk kalla «benchmarkrapport – er utarbeidd av Hans Jørgen Andersen, som er nestleier i styret i Hardangerbadet AS, og Kjell Helvik. Dokumentet var ferdig i juni, men Kvammabadet journalførte det ikkje før HF etterlyste det i oktober.
Dagleg leiar Tom Rasmussen vedgår at det ikkje er ideelt med tanke på nøytralitet at den eine parten i forhandlingane står for ein del av saksgrunnlaget for ny drifts- og samarbeidsavtale om Hardangerbadet. Ordførar Torgeir Næss (Ap) sa i styremøtet i Kvammabadet KF 22. oktober at det kom litt for dårleg fram i saksutgreiinga at det er motparten i forhandlingane som står bak utgreiinga.
– Me er veldig klar over at det ikkje akkurat er Vestlandsforskning som har gjort dette, sa Rasmussen.
I rapporten vert kostnaden med drifta av Hardangerbadet samanlikna med kostnaden med mellom andre Vossabadet og Lustrabadet. I dokumentet vert det hevda at drifta av badet i Kvam er billegare enn dei andre og «hevdar seg godt», mellom anna av di anlegget i Kvam har sambruksfordelar i bygget, energieffektive løysingar og lågare pensjonstkostnader.
I styremøta om saka i haust har Rasmussen og Solberg understreka at rapporten er omtrentleg og dels samanliknar eple og pærer fordi ulike anlegg har ulikt innhald og ulike driftsmodellar, og at dokumentet må lesast i lys av det.
– Det gjev i alle fall ei viss peiling, sa Rasmussen.
Kvammabadet har ikkje betala for analysen. Han er såleis utført meir som eit dugnadsarbeid, påpeika Rasmussen i styremøtet om saka 21. august. Ifylgje han kom initiativet til rapporten frå Hardangerbadet i det fyrste i rekkja av «dialogmøte» om saka.
Helvik, som tidlegare var økonomisjef og seniorrådgjevar i Kvam herad, har ikkje offisielle roller i nokon av dei involverte selskapa. Han var ifylgje referata til stades i det eine av dialogmøta om ny avtale med Kvammabadet KF. Ifylgje Rasmussen og styreleiar Reidun Skålheim Solberg gjekk Hardangerbadet god for at han kunne delta som representant for den private aktøren.
