Møteplassen for dei lange tankane

Laurdag 17. februar stod sjølvaste Dag Hareide på programmet som innleiar i Gamlastovo på Nes Gard. Hans innlegg og den påfylgjande diskusjonen sprengde tidsramma, så seansen tok ikkje slutt før fire timar hadde gått.

Trongt om tankane

Kring 30 pressa seg saman i røykstova på Nes Gard for å få med seg det den tidlegare generalsekretæren i Naturvernforbundet, nansenskulerektoren og Regnskogfondet-leiaren hadde på hjarta. Spørsmålet som innleiaren krinsa omkring denne gongen, var om det er mogeleg å løysa krimakrisa utan å øydeleggja naturen.

– Mange ulike ting vart belyste. Det var moro. Hareide hadde mykje å fortelja og mange anekdotar å by på, fortel husvert og initiativtakar til Samtalar i Stovo, Geirmund Nes.

Mellom anna kjernekraft som mogeleg løysing på klimakrisa vart teken opp. Det temaet lyfta varaordførar Frode Nygård (Frp), som var invitert som deltakar i eit lite panel. Tanken skapa faktisk ikkje stor diskusjon, fortel Nes, som sjølv har vore svært skeptisk til atomkraft. No kan sjølv han vera på gli.

– Det er råd, endåtil for politikarar, å skifta meining når ny informasjon vert tilgjengeleg. Atomkraft i mindre målestoff kan vera fornuftig å greia ut. Ein må vera villig til å tenkja nytt, seier Nes.

Han meiner ein i alle fall skal vera skeptisk til dei mange framlegga om løysingar på klimakrisa som dukkar opp. Mange av dei kan visa seg å vera «skinnløysingar» som kan skapa nye problem.

Forståing og medvit

Målet til organisasjonen Samtalar i Stovo er å tilby ein møtestad for refleksjon og debatt kring aktuelle samfunnsspørsmål i ei tid med store og snøgge omveltingar og endringar.

Forumet starta så smått i fjor vår med det udøyelege mennesket og kunstig intelligens som emne. I haust valde styret – der leiar Nes har med seg Johnny Roy Knudsen og Paul Bernhard Lund – å setja emna tru, von og kjærleik på agendaen med Anneli Eriksen, Lars Fr.H. Svendsen og Kristin Sampson som innleiarar.

Forumet har vore nøydd til å ta inngangspengar for å få drifta til å gå rundt. Dei nemnde emna vart for generelle og allmenngyldige til å kvalifisera til stønad frå Fritt Ord i haust. I vår står miljø, økonomi og kulturelt mangfald på programmet – og dette var godt nok til å utløysa stønad frå stiftinga som skal styrkja ytringsfridomen i Noreg.

Geirmund Nes trur at mange kan kjenna seg makteslause i møte med overveldande samfunnsproblem i ei stadig meir fragmentert verd. Vona hans er å bidra til at folk kan møtast uformelt og snakka i lag på ein seriøs måte, som grunnlag for ei form for samfunnssamtale og auka forståing og medvit.

Ei viktig inspirasjonskjelde for forumet, fortel Nes, er Skjervheimseminaret på Stalheim. Det byggjer på tankane til filosof og debattant Hans Skjervheim.

Nes fortel at det for det meste har kome mellom 20 og 30 på arrangementa, men på sommarfesten på Nes kom vel 60. Nokre er gjengangarar, men det kjem stadig nye andlet. Også enkelte tilreisande dukkar opp.

Treffa finn stad seks gonger i året. Nestemann ut i rekkja er Ove D. Jakobsen, professor i økologisk økonomi ved Nord universitet, som vitjar stova på Nes 20. april.