MOT-avslag møter motgang
Avslaget på MOT-søknaden frå elevrådet ved Kvam ungdomsskule har skapa engasjement, men rådmannen held på sitt.
I søknaden skreiv elevrådet at elevane saknar fokus på det som er verdiane til MOT-programmet i undervisninga – mot til å leva, til å seia nei og til å bry seg. Elevane saknar også undervisning om rusmiddel, evne til å ta gode val, korleis ein kan vera trygg på seg sjølv, korleis ein kan vera ein god ven og korleis ein kan stå opp for andre.
Leiar for skule skreiv i svaret at lærarane i skulen er i ferd med å systematisera eit undervisingsopplegg innan folkehelse og livsmeistring som skal gjennomførast for 1.–10. trinn på kvar skule, der hovudtema er rus, mobbing, nettvit, venskap og gode val.
Kva det går ut på, lyt rådmannen opplysa om i heradsstyret tysdag.
Hallvard Valland Nordheim i elevrådet seier måndag at ei arbeidsgruppe jobbar med eit tilsvar til rådmannen. Det kan du lesa her. I skrivet påpeikar elevrådet mellom anna at elevane ikkje forstår korleis rådmannen har fått MOT til å kosta kommunen 500.000 kroner for eit halvår.
Skreiv ikkje referat
Det var i juni i fjor at heradsstyret vedtok å gje rådmannen fullmakt til å bruka inntil 500.000 kroner til «kjøp og igangsetting av eit førebyggande haldningsprogram, td. MOT eller Mitt Val, med tema mobbing, rus, psykisk helse, livsmeistring, negativ åtferd/haldningar o.l. Haldningsprogrammet skal nyttast i Kvammaskulen».
Allereie i det neste heradsstyremøtet, i september 2022, orienterte leiar for skule, Inga Lill Jensen Tolo, om stoda. Ho sa at vedtaket om eit eventuelt mobbeprogram hadde vorte drøfta med mobbeombodet i Vestland, ein representant for Læringsmiljøsenteret og internt, og at rådmannen meinte at det ikkje var mogleg å setja i verk vedtaket hausten 2022.
– Me bør prioritera tid og ressursar på andre tiltak i denne fasen enn å kjøpa inn eit mobbeprogram, sa Tolo.
Skulesjefen peikte mellom anna på sprikjande forsking på kva program som gjev gode resultat og ressursbruk. Med bakgrunn i innspela heradet hadde fått, ynskte rådmannen å bruka noko av pengane til å henta inn kompetanse frå fagmiljø og setja i verk tiltak heradet hadde fått råd om.
HF har bede om innsyn i referata frå arbeidsmøta. Det finst ikkje referat, opplyser oppvekstsjef Astrid-Anett Steine. Ei oppsummering av møta er presentasjonen i september i fjor, skriv ho.
– Programma rådmannen er i gang med, er veldig langsiktige, mens MOT ville ha hjelpt oss meir her og no, trur me, seier Nordheim i elevrådet.
Endring kostar
Elevrådet på Kvam ungdomsskule søkte om 40.000 kroner. Ein latterleg låg sum å seia nei til, ytra Bjarte Helland (INP) i eit lesarinnlegg. Det ville ha kome fleire kostnader, meiner rådmannen. I svaret til elevrådet skriv ho at summen på 500.000 kroner truleg berre hadde dekt eit halvt år.
Det stemmer ikkje, meiner MOT sin regionleiar i Vestland, Regina Njåstad Vestrheim. Utgiftene er, som rådmannen påpeikar, større enn 40.000 kroner, men truleg også under 500.000 kroner over ein periode på tre år. Dessutan, om det er ynske om endring, vil det uansett kosta både tid og pengar, seier Vestrheim.
Ifylgje henne kostar medlemskap i MOT 35.000 kroner i året per skule. Ein avtale vert eventuelt signert for tre år, med oppseiingstid på seks månader.
Summen på inkluderer mellom anna kursing av såkalla «MOT-coachar», deltaking frå MOT på personalmøte og 12 økter med MOT-undervisning, for å nemna noko. Summen dekkjer ikkje reise til og frå kurs i Trondheim eller utgifta med vikarar for kursdeltakarane, om det trengst.
– Må ikkje vera lærarar
Å setja ein pris på éin dag med vikar er vanskeleg, då kostnaden varierer i stor grad. Men om ein tek utgangspunkt i at vikaren er ein nyutdanna lektor med seks års ansiennitet, som er «heilt vanleg» ifylgje løns- og personalkonsulent Helene Hushagen i Kvam herad, bikkar ein fort 5.000 kroner per dag.
Med tre års kontingent for to skular og reise- og vikarutgifter er summen langt over 40.000 kroner, men likevel under 500.000 kroner over ein periode på tre år.
Og «MOT-coachane» må ikkje vera lærarar. I dag har skulane både helsesjukepleiarar, utekontaktar og miljørettleiarar som kan vera «MOT-coachar». Då slepp ein timevikarar.
I og med at MOT-programmet i hovudsak er laga for ungdom, er det Kvam og Strandebarm ungdomsskule det eventuelt hadde vore aktuelt for i Kvam. Sondre Fagerheim Lunestad i elevrådet seier elevrådet har vore i kontakt med Strandebarm, og at skulen ikkje verka å vera så interessert.
Les også:
Skal merkast
Regionleiar Vestrheim håpar at både elevar, lærarar og leiing vil kjenna litt på det når ein skal ta tak i problematikken, anten ein tek i bruk eit MOT-program eller ikkje.
– Skuta snur seg ikkje sjølv. Og ein lyt ha vaksengruppa med på lag før ein set inn tiltak mot ungdom. Elles går kreftene til å krangla med vaksne. Det vert fort ein «tap–tap-situasjon», seier ho.
Både R, MDG og KrF har teke opp saka før heradsstyremøtet tysdag 3. oktober. Rådmann Anita Hesthamar opplyser til HF at administrasjonen ikkje har hatt tid til å svara på spørsmål om MOT i tida før heradsstyremøtet, men at lenkjer til informasjon er sende til politikarane. Alle spørsmåla er ikkje gjennomgått i detalj, men orienteringa som vart gjeven av leiar for skule til heradsstyremøtet i september i fjor, svarar på noko av det.
Søknaden frå elevrådet er datert 19. juni, men vart ikkje offentleg før i slutten av august. Grunnen er sjukdom før ferien, seier Tolo. Ho opplyser at ho korkje las eller svara på e-postar før ferien. E-posten har «glippa», og elevane fekk såleis ikkje svar før glippen vart oppdaga.
