Sportsutstyr var bytt ut med datamaskinar i Øystesehallen denne veka.

Mørke netter og lyse skjermar i Øystese

Mange prøvde å halda seg vakne gjennom heile arrangementet då KvammaLAN denne veka vart arrangert for andre gong.

Publisert

– Me har hatt fleire som har byrja optimistisk, men ingen klarar å halda seg vakne i 70 timar. Augo lukkar seg raskt etter at ein har passert 24 timar, fortel Daniel Olsen, som er styreleiar i arrangørklubben Kvam E-sport.

Arrangementet, som er i Øystesehallen, varer frå tysdag til fredag. HF såg fleire deltakarar som sov i stolane då avisa var innom onsdag ettermiddag.

– Sjølv om nokre søv i stolane eller nyttar sovesalen me har laga til, er mitt inntrykk er at dei aller fleste går heim for å sova, fortel Olsen.

Kristi Valland Fykse fortel at ho har spela fleire spel på KvammaLAN. Her spelar ho eit spel ho ikkje hugsa namnet på.

– Saknar jentene

Det galdt to av deltakarane HF snakka med. Kristi Valland Fykse frå Øystese er ei av relativt få jenter på KvammaLAN.

– Det er kjekt å spela når ein er saman med mange andre, men det skulle vore fleire jenter her, seier ho.

– I fjor «døgna» eg, men i år har eg vore heime for å sova, fortel ho.

Sondre Tveiterås (13) fortel at han hadde halde seg vaken heile den første natta, men i sjutida om morgonen gjekk han heim til senga.

– Eg sov til klokka eitt, så no er eg utkvilt og opplagd, fortel han.

Mykje av det ein gjer på eit LAN, kunne ein gjort heime.

– Det som gjer eit LAN så kjekt, er at ein sit saman med kompisar og ser kva dei driv med, fortel han.

Sondre Tveiterås er glad i bilspel. Her spelar han eit spel der ein både byggjer og køyrer bilen.

– Fleire duppedingsar

Ifølgje Olsen er årets LAN vorte større.

– Me har skalert opp. Det er fleire duppedingsar og plass til fleire deltakarar, og denne gongen har me opna opp for publikum, fortel han.

Onsdag hadde han ikkje full oversikt over talet på deltakarar.

– Ein del møter berre opp utan å melda seg på. I år er det om lag 70 som har meldt seg på på førehand. Det er langt fleire enn i fjor, fortel han.

Dei seks styremedlemmene i Kvam E-sport har brukt fleire månader på å planleggja arrangementet. Ein frå styret er til stades til ei kvar tid for å ta hand om eventuelle tekniske problem.

Ole Aleksander Hauger spelar Minecraft medan Emil Øyri ser på. Gutane er samde om at KvammaLAN er ei oppleving dei vil anbefala til andre.

I tillegg har arrangøren rekruttert ein flokk foreldre og andre frivillige til å vera vakter.

– Dei vaktene eg har snakka med, fortel at det er rolegare å vera vakt her enn til dømes på ei fotballturnering. Her vert ingen skadd og her er det ingen store problem som må løysast, fortel Olsen.

Uteaktivitetar og føredrag

Nytt av året er eit føredrag og nokre uteaktivitetar. Føredraget stod youtubar og gamar Preben Fjell for.

– Me har fått pengar frå Sparebanken Vest og Kvam herad til å leiga inn underhaldning. Me fekk napp hos Fjell. Han skal mellom anna snakka om utfordringar rundt gaming, fortel Olsen.

Minecraft og Fortnite var truleg dei spela flest spela på KvammaLAN. Emil Vik spela i staden Euro Truck Simulator 2.

Kvam E-Sport har lånt utstyr til å driva med såkalla boblefotball. Aktiviteten stod på programmet både onsdag og torsdag, men onsdag gjorde regn og lyn at den vart avlyst.

– Ein sit mykje i ro når ein spelar spel. Me i Kvam E-Sport er opptekne av at gamarar skal røra på seg, seier Olsen.

Laga med Labrador CMS