Morellsesongen i år kan vere den beste i moderne tid
I år er morellane ekstra store og søte, og sesongen er kort. Morellsesongen i år er historisk god, ifølgje Opplysningskontoret for frukt og grønt.
– Eg har aldri opplevd så stort volum på morellar, seier Leif Øie. Han er fruktinspektør i Grøntprodusentenes Samarbeidsråd.
Opplysningskontoret for frukt og grønt melder no om ein historisk god morellsesong.
Artikkelen held fram under annonsen.
Øie opplyser at det i 2023 er forventa ei avling på 695 tonn, noko som er meir enn vanleg. Sidan 2013 har det vore hausta mellom 380 tonn og rett i overkant av 600 tonn.
– Tradisjonelt sett har det alltid vore mest morellar frå Lærdal, men no er det altså i Telemark dei haustar dei største voluma, fortel han.
Dette blir stadfesta av morellprodusent Trond Bergskås frå Telemark.
– Sesongen startar rundt 17. juli, eg reknar med eg kan hauste til 7. eller 8. august. Det kjem mykje morellar i år, og dei er ekstra store og søte på grunn av den gode varmen vi hadde i juni, seier Bergskås.
(©NPK)
