Mønstra på Mikkjelsflaten
Under Siderfestivalen vart det arrangert kalvemønstring for borna. 12 born og kalvar vart vurderte på kontroll og utsjånad.
Kalvemønstring er kort fortalt ei utstilling av kalvane. På Mikkjelsflaten skulle borna gå ein runde rundt tre kjegler mens dei viste fram kalven og kontrollen dei har på han.
Det fortel Guro Stuve i Vikøy og Øystese bondelag, som var arrangør. Deltakarane vert òg dømde etter utsjånad og kor rein kalven var. Frå gamalt av var det normalt å ha utstilling og selja dyra på auksjon.
Laurdag vart det berre tanken å få til noko kjekt for borna. Opplegget har vore ein tradisjon før, men no var det meir enn ti år sidan sist gong. For berre ein månad sidan sende bondelaget ut påmeldingsskjema for å sjå om konkurransen vart mogeleg å gjennomføra. Stuve set stor pris på at så mange bønder tok seg tid til å vera med borna på mønstring i ein travel kvardag.
Målet var at borna skulle få vera med dyra og få møta andre born på gardar. Guro Stuve har brukt det som motivasjon for at borna skulle vera med i fjøsen og vera med dyra. Borna verka òg positive til opplegget, og var stolte over dyra sine, fortel ho.
Sønene Jon og Even Stuve, som har gått med kalvane sine, håpa inderleg på ein siger til ein av dei. Dei har øvd mykje med kalvane dei siste vekene, og det var ikkje lett å få kalvane til å gå der dei ville i starten. Begge synest det var veldig kjekt å gå med kalvane.
Det same meiner Mathilde Opheim, som gjekk med kalven Rampeline. Namnet har kalven fått fordi ho er så rampete. Også Mathilde håpa å vinna, men var ikkje sikker på om ho kom til å gjera det. Men ho syntest det gjekk veldig fint.
Risiko for smittespreiing og for å mista kalvane var to problemstillingar arrangørane måtte løysa før mønstringa. Mattilsynet vart kontakta. Tilsynet sa at det skulle gå greitt. Arrangøren hadde flasker med desinfiserande sprit ståande. Det vart dessutan parkert traktorar og bilar for å hindra kalvane i å springa ut i vegen viss borna mista taket i taua.
Både publikum og borna verka positive til opplegget, og såg ut til å kosa seg. Dei unge bøndene storkosa seg, sjølv når kalvane var ville og ikkje lydde, smilte og lo dei. Dei fekk vist fram kalvane sine og kor flinke dei har vore i fjøsen og til å få kontakt med dyra den siste månaden.
Dommarane Kari Åsheim Valland og Hallstein Mo frå bondelaget gav prisen for beste mønstrar til Johanna Hjelmeland. Prisen for den finaste kalven gjekk til Julie Opheim, som vant høyrselsvern til premie. Resten fekk kaps, diplom, handklede og sjokolade.
– Det var kjekt å laga til noko for ungane, seier Guro Stuve.
Sjå fleire bilete her:
