Mong får pris: – Treng slike
Framnes-lærar Jarle Mong er tildelt Medierosen av Tro & Medier.
– Skikkeleg gøy! Det var ekstremt mange gode kandidatar, så eg var glad berre for å vera nominert, seier vinnaren til Tro & Medier.
Læraren på privatskulen i Vikøy fekk flest røyster av dei seks nominerte. Nominasjonen grunngav juryen med at Mong har markert seg som ein dugande, modig skribent som med skarp penn og klart hovud held viktige debattar levande.
– I vår tid treng me menneske som vågar å utfordra konsensus og et ytringsrom som har blitt mindre dei siste åra. Difor er Jarle Mong viktig, heiter det i grunngjevinga.
Han seier til Tro & Medier at han er oppteken av å formidla det som er sant, godt og rett. Etter hans syn er den kristne visjonen av samfunnet og livet best. Mong gler seg over at han når breitt ut med skriveria, og meiner det er rom for å vera kristen i det offentlege rommet.
– Eg trur plassen ofte står ledig, men at det er for få som vågar å ta mikrofonstativet, seier han til nettstaden.
Tidlegare i år gav Mong ut boka «Mer mann», der han drøftar mannsrolla frå ein kristen ståstad.
Mong, som er fotballinteressert og har spela mange kampar for Bryne i 1. divisjon, vert tildelt prisen på eit arrangement i Oslo 14. oktober.
