– Mok taket før du trur

Knirkar det i huset? Eller går dørene tregare enn vanleg? Då er det truleg på tide å reagera. Også byggjeår spelar ei rolle for kva tid du lyt finna fram stige og spade.

– Det er lurt å fylgja litt med, seier prosjektleiar Mathias Vognstølen i Botnen Entreprenør AS.

Slik det er i dag, er bygningar gjerne litt overdimensjonerte, nettopp med tanke på at det kan koma litt meir vêr enn venta. Likevel kan det vera lurt å få vekk snø om ein har store mengder på taket no som vêret vert mildare, seier han.

– Mok gjerne litt før du trur.

– Har du moka ditt tak?

– Nei.

– Skal du?

– Eg har eit forholdsvis nytt hus som skal vera dimensjonert for ein del snø, men eg har ein flat del eg tenkjer eg skal moka, seier Vognstølen.

Eldre hus toler mindre

Dei siste dagane har det falle mykje snø. Sundag skal det slå om til regn, ifylgje vêrmeldingane. Då aukar vekta på snøen monaleg.

Ifylgje Direktoratet for byggkvalitet vil hus som er bygde mellom 1950 og 1979, truleg tola inntil 50 centimeter tørr snø, gamal snø eller om lag 40 centimeter våt snø på taket.

Hus bygde frå og med 1980 toler oftast meir. Kva som er teke høgd for under bygginga, skal ein kunna sjå i berekningsgrunnlaget. Det kan du eventuelt sjekka med kommunen, tipsar direktoratet.

Om taket etter planen skal tola 250 kilo per kvadratmeter, vil det seia 80 centimeter tørr, gamal snø eller 60 centimeter våt snø. 350 kilo per kvadratmeter skal tola 120 centimeter tørr, gamal snø eller 90 centimeter våt snø.

– Ikkje alltid snøen er mjuk

Ifylgje Arne Voll, kommunikasjonssjef i Gjensidige AS, går det ikkje éin vinter utan at det vert meldt inn fleire hundre snøskadar. Mange tak er gjerne bygde for stor snøtyngde, men det kan også skada takrenner, nedløp, terrassar og ting som ligg på bakken.

– Eg veit me har hatt nokre titals skadar på Vestlandet i vinter, seier Voll.

Sjølv om hus og hytter no er dimensjonerte for å tola meir, kan skadane koma også oppå taket eller langs husvegger. Det er viktig jamleg å sjå til hus og andre bygg ein har.

– No har det vore meldt mykje snø i alle kanalar, og alle har fått det med seg. Om noko skjer no, kan det medføra ein kraftig avkorting om det skjer skadar, seier Voll.

I forsikringsavtalen er hen som eig bygningen, pålagd å fjerna snø jamleg frå tak, vegger, verandaer og terrassar for å førebyggja og avgrensa skadar, opplyser han.

Spesielt uthus, garasjar og driftsbygningar bør ein sjå til. Ofte er det det som ryk fyrst, seier Voll. På slike bygg er det òg svært viktig å tenkja på tryggleik, meiner han. Det er viktig å sikra seg mot å gå gjennom taket eller falla ned frå det. Det er ikkje alltid snøen er mjuk, slår han fast.

– Nokre kvart år

Ein høyrer gjerne om hytter som rasar saman på grunn av snøtyngd, men det er sjeldan hus rasar saman, seier Voll.

– Me har nokre kvart år, men det er mest driftsbygningar. Så er det viktig å hugsa at ein kan få store skadar sjølv om ikkje taket rasar, seier han.

Det handlar om å ta vare på ting. Når dørene fyrst knirkar, er gjerne skaden skjedd, fortel Voll. Spesielt hytter med torvtak, der snøen samlar seg lag på lag, er utsett.

Ta taket før snøen gjer det– og gjer det no medan han er lett, oppmodar Voll om.