Mogleg thaimat i Strandebarmstunet

Stein Helge Berge i Strandebarm har nemleg søkt Kvam herad om løyve til å parkera ei matvogn i tunet. Der vil sambuaren hans, Atitaya Boonmak frå Thailand, servera thailandsk ta-med-mat.

Dei to vil gjerne at vogna skal få stå utanfor den gamle minibanken til Sparebanken Vest i eitt år frå 28. august. Arealet som trengst, er 15 rutemeter stort.

Paret har hatt planar om tiltaket ei stund, men det er fyrst det siste halvåret at dei har gjort noko konkret.

Boonmak har tidlegare arbeidd som snikkar i Frekhaug Vinduet AS. Då ho flytta inn til Berge, måtte ho ha noko nytt å driva med. Boonmak har lang erfaring med å laga mat frå Thailand, der ho dreiv ein restaurant saman med onkelen sin. Ho har òg jobba som assistent på kjøkkenet på aldersheimen på Austrheim.

Neste steg er at dei skal henta vogna på Hamar. Vogna frå 2019 er ferdig innreidd, seier Berge.

Boonmak seier maten vert sunn, med mykje grønsaker. Ho vil servera mellom anna vårrullar og wok med scampi, kylling, biffkjøt og ris.