Desse store verna områda skal sikra at samspelet i naturen ikkje vert forstyrra, og er ein viktig del av arbeidet med å hindra at plantar og dyr vert utrydda. Biletet er teke mellom Botnane og Vossadalshola, som er innanfør dei førebelse parkgrensene.

Mogleg nasjonalpark i kvammafjella

Status som nasjonalpark set ein stoppar for inngrep i naturen og gjev eit svært omfattande vern gjennom naturmangfaldlova. Ein del av kvammafjella er eitt av fire område som Miljødirektoratet tilrår å greia ut som nasjonalpark.

Ragnhild Økland Børven
Publisert Sist oppdatert

Det opplyser Miljødirektoratet i ei pressemelding.

— Dersom Klima- og miljødepartementet vurderer fjella til å verta nasjonalpark, vert inngrep i landskapet i utgangspunktet forbodne, fortel fagdirektør i Miljødirektoratet Olav Nord-Varhaug.

Det gjeld mellom anna vegar, regulering av vassdrag, graving, gjerde, bruer og luft- og jordleidningar.

Noko i Fyksesund

Ein nasjonalpark er eit stort naturområde med særeigne eller representative økosystem. Det kan også vera landskap utan tyngre naturinngrep, skriv Miljødirektoratet på heimesidene. Desse store verna områda skal sikra at samspelet i naturen ikkje vert forstyrra, og er ein viktig del av arbeidet med å hindra at plantar og dyr vert utrydda.

— Om ein skal diskutera vidare ein nasjonalpark i området, bør ein vurdera om ein også skal ta med noko av fjellsidene ned mot Fyksesundet. Då kjem prinsippet om frivillig vern inn, seier Nord-Varhaug.

Frivillig vern går ut på at skogeigar tilbyr skogsareal for vern. Skogeigar avstår då retten til å driva skogbruk i området, og vil få erstatning for tap av framtidige inntekter knytte til skogbruk i området. Skogeigar beheld eigedomsretten og jakt-, fiske- og beiterettar.

Ukjent for heradet

Miljødirektoratet gjennomførte i februar og mars fem regionale nettmøte der alle 77 råka kommunar var inviterte. HF har vore i kontakt med Kvam herad om saka, men heradet kunne ikkje gje utfyllande opplysningar og har truleg ikkje delteke i møta.

Noreg har 47 nasjonalparkar i dag. Folgefonna Nasjonalpark i mellom anna Ullensvang er ein av dei og vart oppretta i 2005. Hardangervidda, også delvis i Ullensvang, er ein annan.

I ein tidlegare versjon av artikkelen vart det opplyst at Noreg har berre sju nasjonalparkar. Det korrekte er 47. Artikkelen vart retta torsdag 9. april klokka 21.20.

Red.

Kartutsnittet viser førebelse grenser for ein eventuell nasjonalpark. Dersom departementet vel å gå vidare med forslaget, vil grensene verta grundig handsama i nært samarbeid med dei tre involverte kommunane, opplyser Miljødirektoratet.
At Bergen og Hordaland Turlag har fire sjølvbetente hytter og eit godt etablert stinett i området, er ein del av grunnlaget for vurderinga. Store delar av det aktuelle området er registrert som svært viktig friluftsområde.

Difor kan øystesefjella verta nasjonalpark

Området inneheld mellom anna svært viktige naturtypar som fossesprøytsone, bekkekløft og bergvegg.

Det er registrert 16 truga og sårbare artar i området, til dømes vipe, bergirisk, sivspurv og bakkesøte.

Berggrunnen er variert og består mellom anna av relativt store areal med grønstein, fyllitt og grønnskifer som gjev kalkrike vekstforhold.

Det er registrert kalkkrevjande artar i området, og kalkrike område sør for Torefjell.

Det er registrert rik flora knytt til fuktige sig og snøleiesamfunn.

Området har ei tregrense på opptil 600 meter. Difor vil det sjølv ved ein temperaturauke på 2,2 grader på grunn av klimaendringar vera store areal i det aktuelle området som vil vera eigna for raudlista naturtypar som snøleie, våtsnøleie, snøleieberg og rabbe.

Rein er observert jamleg i området siden 1980. Næraste leveområde for villrein er på Oksenhalvøya, om lag 25 kilometer unna.

Kongeørn, jaktfalk og hubro har fast tilhald i området.

Bergen og Hordaland Turlag har fire sjølvbetente hytter og eit godt etablert stinett i området. Store delar av området er registrert som svært viktig friluftsområde.

Kjelde: Miljødirektoratet

miljøvern politikk plantar og dyr nyhende norheimsund natur og miljø stortinget global oppvarming bergen og hordaland turlag øystese
Laga med Labrador CMS