Moderne gjenvinningsstasjon i Kvam er snart klar

4. april overtok renovasjonsselskapet formelt den 8.600 rutemeter store tomta i industriområdet i Norheimsund frå Kvam herad. Før opninga 20. april skal det «møblerast» med alt som krevst for å tilby kvemmingane ein moderne gjenvinningsstasjon.

– Og innimellom der kjem påskeferien, så dei må berre stå på, konstaterer kommunikasjonsrådgjevar Tina Skudal i Bir.

Stor investering

Tomtekjøpet kostar Bir ti millionar kroner. Bygginga av anlegget kostar ytterlegare 30 millionar.

Leiar for gjenvinningstenester i Bir Privat AS, Christian Roti, orienterte tysdag heradsstyret om den nye stasjonen. Han la ikkje skjul på at det kvemmingane får i fanget, er eit topp moderne anlegg – «neste generasjons gjenvinningsstasjon» – i Sandvenhagen. Bir Privat-styret vedtok nemleg i 2019 at det skal verta ein pilotstasjon for testing av nye løysingar for levering av avfall. Med splitter ny stasjon kan infrastrukturen leggjast til rette for ny teknologi.

– Det er ikkje så ofte me byggjer nye, seier Roti når HF spør kvifor valet fall på Kvam som «heim» for pilotprosjektet.

– Det er eit slags «velkomen til framtida», dette, konstaterte ordførar Torgeir Næss (Ap) etter presentasjonen.

Mindre kubikkrangel

Den viktigaste endringa frå den tradisjonelle modellen for gjenvinningsstasjonar, og frå den gamle i Tolomarka, er at kundane vert digitalt identifiserte og at vekta på avfallet vert registrert ved at bilar og tilhengarar vert vegne når dei kjem og når dei reiser – og faktisk ein gong mellom der òg.

Løysinga føreset – sjølvsagt – at kundane nyttar ein app der ein QR-kode vert registrert av lesarar på stasjonen. Roti opplyste at det har vore vrient å konstruera nyvinninga, men Bir har stor tru på at ho vil vera klar til opninga. Neste steg vert automatisk bilskiltlesing, slik at betalinga går heilt automatisk og ein ikkje eingong merkar at ein har punga ut.

Dimed vert det slutt på «subjektiv vurdering» av kor stort lasset er, noko som jamleg er ei kjelde til usemje og konfrontasjonar mellom kundar og kunderettleiarane til Bir. Roti seier til HF at diskusjonar om kubikkmeter er ei vanleg utfordring, ettersom det i dag er rom for ei viss usemje om det eksakte volumet. Vanlegast er nok krangelen om lasset er over eller under ein kubikkmeter.

Med den nye løysinga kan dei tilsette nytta meir tid til avfallsfagleg kunderettleiing – eller på litt jordnær norsk hjelp til å sortera korrekt.

– Me får ei meir nøyaktig, sikker og profesjonell tilnærming til kundane våre, sa Roti til politikarane.

Dei reaksjonære kan gle seg over at det framleis vil vera mogeleg å få avfallet vurdert og gjera opp for seg på gamlemåten. Roti vonar at flest mogeleg vil ta i bruk siste nytt. Like mange som før, kanskje fleire, tilsette vil vera på plass, ifylgje han.

Gratis og betaling

Strukturen og køyremønsteret på den nye stasjonen inneber at kundane fyrst kjem til «gratissona», der dei kan levera mellom anna ymse farleg avfall utan å betala. Når det er dumpa, vert «kunden» vegen for andre gong før han kjem til betalingssona for å levera anna avfall. Tredje og siste runde på vekta ventar før bommen går opp og ein kan reisa litt lettare – om ikkje til sinns, så i kilo – heim att.

I teorien kan ein juksa til dømes ved å få eit par–tre velfødde vener til å setja seg i bilen og slik auka vekta på lasset før utkøyring. Roti trur at det truleg vil verta eit lite problem sidan vektintervalla uansett er grove, dei fleste kundane vil identifisera seg og tilsette fylgjer med.

Prisar og gebyr vert inntil vidare som før. Prisen kvar kunde betalar, er altså basert på vektintervall og ikkje på det eksakte talet på kilo. Sistnemnde kan verta aktuelt seinare. Appen ligg til rette for å verta utvikla med nye funksjonar og løysingar.

Ifylgje Roti vil prisen i fyrste omgang vera 50 kroner for avfall under 250 kilo og 100 kroner mellom 250 og 500 kilo.

Gjenbruk i vinden

Brukthallen – staden for dei som jaktar på bruktskattar – har fått ei sentral plassering med god tilgang, store vindaugo, eit estetisk fint inngangsparti og eit eige parkeringsareal. Bir legg stadig større vekt på gjenbruk, understreka Roti.

Ifylgje han har det i møbleringa av området vore viktig å, så langt råd er, skilja kundane frå tungtransport og tunge maskiner for å betra tryggleiken. Det har ein langt på veg lukkast med, meiner Roti.

Bir ynskjer innspel frå brukarane om den nye stasjonen for å kunna forbetra tilbodet.

Opnar med «tilbod»

Røynstrand Entreprenør AS har bygt anlegget, med mellom andre Kjosås Maskin AS og Hardanger Byggsenter AS som underentreprenørar. Arbeidet har gått smertefritt og utan alvorlege hendingar, ifylgje Roti.

På opningsdagen vert det fest for alle som vil koma. Eit sentralt trekkplaster er høve til å levera bos utan å betala for det. Meir tradisjonelle lokkemiddel er talar og fleire kulturinnslag, sistnemnde mellom anna med lokale krefter.

Konsernsjef Borghild Lekve i Bir og ordførar Torgeir Næss i Kvam herad får ordet før snora vert klipt. Sidan vert det tevling i den relativt sjeldsynte øvinga mjølkekartongbretting om omvising på den nye stasjonen.

Tina Skudal oppmodar folk spesielt om å ta med seg ting som kan høva i den nye brukthallen. Dei må vera – ja, brukande.