– Mistanke om lakseanemi
Det er mistanke om tilfelle av infeksiøs lakseanemi ved oppdrettsanlegget Nye Hessvik i Ullensvang.
Det opplyser Mattilsynet på heimesida. Oppdrettaren varsla tilsynet om mistanken fredag 27. januar. Hardanger Folkeblad skreiv om saka fyrst.
Infeksiøs lakseanemi (ILA) er ein alvorleg, smittsam virussjukdom hjå laks. Viruset er ufarleg for menneske. Regnbogeaure kan verta smitta, men utviklar vanlegvis ikkje symptom på ILA, opplyser tilsynet.
Lokalitetar med påvist ILA skal slakta eller destruera laksen, reingjera og desinfisera anlegget før det vert lagt brakk i minimum tre månader.
Bremnes Seashore AS og AS Bolaks driv lakseoppdrett i anlegget.
Alle som ferdast i området og driv aktivitet knytt til fiskeoppdrett, må visa naudsynt aktsemd for å hindra spreiing av eventuell sjukdom, skriv tilsynet.
Mattilsynet planlegg ein snarleg inspeksjon i anlegget for å ta prøvar. Viss mistanken vert stadfesta, vil det verta oppretta ei restriksjonssone for å førebyggja, avgrensa og overvinna ILA. Sona må forventast å vera på mellom éi og to mil.
