Mista sponsorar og gjekk i minus

Konferansen i regi av Hardangerrådet gjekk føre seg i Ulvik i november. Inntektene var 46.690 kroner mindre enn utgiftene.

Vestland fylkeskommune og Eviny har trekt seg som sponsorar. Sjølv om Sparebankstiftinga Hardanger har auka stønaden til 200.000 kroner, rekk ikkje det til å dekkja alle kostnadene. Halve summen gjekk til ein forskingsrapport. Rådet måtte difor henta pengar frå «restmidlar» etter Regionalt næringsfond Hardanger.

Kostesam reklame

– Er det vanleg at me går i minus? spurde rådsordførar Roald Aga Haug (Ap) då rådet drøfta saka i Norheimsund 14. desember.

– Det varierer litt frå år til år. Me har stort sett gått i balanse eller med eit lite pluss, sa dagleg leiar Jostein Eitrheim.

Ordførar Timo Knoch (Ap) i Eidfjord sette spørjeteikn ved rekneskapsposten marknadsføring. Kostnaden vart 81.309 kroner og var den nest største.

Eitrheim viste til at rådet lenge har hatt avtale med eit selskap i Bergen som mellom anna driv ei eiga nettside for konferansen og har hjelpt til med marknadsføring i sosiale medium og på konferansen. Heile summen til marknadsføring gjekk til den eine aktøren.

– Dei yter ein heil del timar i planlegging. Det kan sjå veldig ut, men me har vurdert det slik at dette er god hjelp for å få god kvalitet, sa Eitrheim.

Det var nokre færre deltakarar i 2023 enn tidlegare år, men ifylgje konsulent Trude Rinaldo hentar ikkje rådet inn mykje frå desse. Stigande prisar og underbudsjettering av innleigde aktørar medverkar til budsjettsprekken. Færre deltakarar førte til at ein større del av hotellrekninga enn venta måtte dekkjast av rådet sjølv.

Skeptisk til kostnad

Knoch meiner kombinasjonen av dyr marknadsføring og færre deltakarar gjev grunn til å spørja seg kva ein bør gjera annleis i 2024. Haug meiner det er grunn til å sjå om kostnaden med marknadsføringa gjev nok vinst att. Dessutan meiner han at arrangørane bør setja av meir tid til spørsmål frå salen etter innlegga, og at ein må sjekka nøye om tidspunktet kolliderer med andre store arrangement.

Rinaldo påpeika at Knoch som ny rådsordførar får høve til å vera med og bestemma neste år. Arbeidet startar etter nyttår.

– Det er stort sett gamle folk som deltek. Diverre. Me skulle gjerne hatt fleire ungdomar, sa Jostein Eitrheim.

Rådmann Ole-Jørgen Jondahl i Ullensvang meiner ein bør drøfta kva som er i målgruppa. Han hadde venta at fleire frå næringslivet hadde delteke i år, då berekraft og klima var hovudtema, og såg til dømes få representantar for næringslivet i Ullensvang. Han meiner ein bør gjera ein framstøyt mot dei næringsdrivande for å få dei til å delta.

– Konferansen vart veldig bra og hadde høg kvalitet. Trivnaden var veldig god. Det var etter mitt syn ein av dei mest vellukka me har hatt, sa Haug.

Ifylgje saksutgreiinga er konferansen ein «svært viktig møteplass for heile Hardanger» som bidreg til å «utvikla regionen for framtidig vekst og utvikling».