Mista førarkortet etter at bil hamna på sida

Ein bil hamna på sida i ei trafikkulukke sentralt på Mundheim i Kvam torsdag ettermiddag. Berre den eine bilen var innblanda i hendinga på fylkesveg 48.

Det melde Vest politidistrikt i Politiloggen klokka 14.08. Naudetatane rykte ut.

Måndag opplyser fungerande politistasjonssjef ved Kvam politistasjon, Marita Flemmen Skogvoll, at den unge føraren fekk førarkortet kverrsett etter uhellet.

Ifylgje Skogvoll trefte hjulet ein murkant på høgre sida, og bilen velta.

– Føraren er mellom 18 og 20 år. Det er ikkje mistanke om rus, seier Skogvoll.

Bilbergar vart tinga, og trafikken flaut etter kvart forbi ulukkesstaden, melde politiet.