Misnøgde med kollektivtilbodet i Kvam

Det går éin rutebuss frå Øystese til Vikøy med 10 minutt ventetid i Norheimsund i løpet av dagen. Bortsett frå denne er ventetida frå 30 til 60 minutt.

Elevar ved Kvam vidaregåande skule opplyser til HF at dei skulle ynskja at busstilbodet var betre mellom Øystese og Vikøy. Den einaste rutebussen som går frå Øystese til Vikøy, med 10 minutt venting i Norheimsund, går ein time etter at ein del av elevane er ferdige på skulen.

For å sleppa å venta så lenge, tek nokre av elevane ungdomsskuleeelevane sin skulebuss, noko det ikkje er lagt opp til at dei skal gjera. Elevane seier til HF at dei vil vera anonyme, fordi dei eigentleg ikkje har høve til å ta den bussen.

Iver Johannes Klyve er elev ved Framnes Kristne Vidaregåande Skule og spelar for Rossvoll Volleyballklubb. Han og nokre andre elevar frå Framnes treng skyss til og frå volleyballtrening i Øystese kvar onsdag. Han seier at elevane er avhengige av å få skyss, fordi bussrutene ikkje passar med treningstidene.

Dersom dei tek buss, kjem dei anten nesten to timar for tidleg eller meir enn éin time for seint til treninga. Viss dei tek buss tilbake frå treninga, må dei venta i Norheimsund i ein halv time.

Pressekontakt Øyvind Strømen i Skyss forklarar at to ulike bussruter vert drivne på strekninga Øystese–Vikøy. Den eine er 925-bussen, som går frå Voss til Bergen. Den andre er 749-bussen, som køyrer frå Norheimsund til Mundheim. Begge har koplingar til og korresponderer med andre ruter. For 925-bussen gjeld dette på Voss, i Granvin, i Kvanndal, i Norheimsund, på Bjørkheim og i Arna. Line 749 har korrespondanse med ferja i Tørvikbygd og på Mundheim.

Det blir difor gjort prioriteringar for at puslespelet skal gå opp, med tanke på kvar dei fleste reiser. Dette betyr at det kan verta ventetid for reisande frå Øystese til Vikøy, ifylgje Strømmen.

Journalistane er mediefagelevar på Framnes Kristne Vidaregåande Skule. Red.