Miskunnsam samaritan bergar kyrkja igjen
R, SV og INP ville ikkje utan vidare gje kyrkja ein million kroner til å dekkja over gamle synder.
Dei tre partia tykte informasjonen om søknaden frå kyrkja om underskotsdekning var av det tynne slaget.
– Det er ikkje mistillit, men det var veldig tynt. Me treng å gjera eit informert vedtak, og vil vita meir om korleis ein vil unngå at dette gjentek seg kvart år, sa Håvard Gjerde (R) i ordskiftet om 2. tertialrapport onsdag 25. september.
Framlegget til trioen var å droppa løyvinga og be kyrkja koma med meir bakgrunnsinformasjon og ein plan for å hindra nye budsjettoverskridingar. Ingen andre støtta det.
Arne Opsahl-Engen (H), som er kommunal representant i fellesrådet, opplyste at bakgrunnen for underskotet er gapet mellom kostnader og tilskot. Han meiner Kvam brukar lite på kyrkja samanlikna med til dømes Ullensvang og Kvinnherad, og at ho såleis er underfinansiert.
– Det er ingen berekraftig måte å driva på, sa han.
Gjerde svara at det kan vera Kvam brukar for lite, men vil likevel ha meir informasjon om kostnadene som gjer det uråd å få eit budsjett i balanse.
