– Misforstod tilskotet i år
Hardangerbadet AS har bede Kvam herad dekkja kostnaden med drifta av Kvammabadet KF i 2024.
Det har frå starten av vore ein føresetnad at drifta av det kommunale føretaket skulle dekkjast av det private selskapet. I år ser kostnaden ut til å verta om lag 0,9 millionar kroner.
Hardangerbadet vende seg munnleg til Kvammabadet i eit dialogmøte mot slutten av forhandlingane om ny drifts- og samarbeidsavtale, og spurde om heradet kan dekkja kostnaden. Bakgrunnen for ynsket er at anlegget reknar med eit negativt resultat også i år – denne gongen på vel to millionar kroner, om lag 1,4 millionar verre enn budsjettert.
Ifylgje saksutgreiinga til Kvammabadet KF er årsaka til dei raude tala ei mistyding av auken i det kommunale tilskotet til drifta av badeanlegget i år. Hardangerbadet skal ifylgje saksutgreiinga ha trudd at tilskotet på 3,1 millionar kom i tillegg til summen det kostar å drifta Kvammabadet, slik at denne summen ikkje måtte nyttast til å dekkja også denne kostnaden. I tillegg til mistydinga har selskapet peika på auka personalkostnader, generell prisauke og meirkostnader med ny drifts- og samarbeidsavtale som økonomiske utfordringar i 2024.
Styret i Kvammabadet rådde 22. oktober heradsstyret til å gå med på å yta 900.000 kroner til for å redusera underskotet i det private selskapet.
Framlegget til dei folkevalde rommar ein føresetnad om at Hardangerbadet Eigedom AS, majoritetseigar i Hardangerbadet, dekkjer resten av det spådde underskotet med konsernbidrag eller kapitalutviding. I tillegg må private kausjonistar etter alt å døma trø til for å dekkja tap også i år.
Ordførar Torgeir Næss (Ap) etterlyste i styremøtet 22. oktober ein søknad. Han sa at det var uklart i sakspapira at det er Hardangerbadet som har søkt om hjelp. Rådmann Anita Hesthamar oppmoda om at vilkåra for løyvinga vart gjort meir tydelege. Styremedlem Frank Helland, som takka for seg som styremedlem i møtet, påpeika at «motrekningsmetoden» var den same i år som i dei fire føregåande åra.
Formannskapet drøftar saka 7. november, før heradsstyret avgjer henne 14. november. Rett før det ordinære formannskapsmøtet er det dialogmøte mellom Kvammabadet og formannskapet.
