– Mindre skjermtid verka positivt
Framnes Kristne Vidaregåande Skule inviterte kunnskapsminister Kari Nessa Nordtun (Ap) til skjermfrie dagar 2.–4. april, men ho takka nei.
Desse dagane oppmodar skulen elevar og tilsette om å leva utan skjerm eller avgrensa skjermbruken til eit minimum.
Eit tilsvarande arrangement våren 2023 var ein stor suksess, ifylgje lærar Sverre Lindøy. 60 prosent av dei 265 elevane valde å levera inn telefonen i tre dagar, og opplevde at dei fekk betre tid både til skulearbeid og til å vera saman med andre. Det var òg lettare å konsentrera seg. Skjermfrie dagar kan skapa viktige refleksjonar om skjermbruk, meiner Lindøy.
Den vidaregåande skulen trur at besøket ville vore eit høve for ministeren til å få kunnskap og motivasjon i arbeidet med problemstillingane. Samstundes ville det vera ei glede og ein motivasjon for skulen om ministeren ville setja av tid, opplyser Lindøy.
Kunnskapsministeren meiner det er viktig å balansera skjermbruken i skulen, ifylgje regjeringen.no.
