Mindre inntekter enn venta av lakseauksjon
Lakseauksjonen for åtte sonar langs kysten gav i underkant av fire milliardar kroner i inntekt til staten og kommunane som har lakseproduksjon. Sjømat Norge meiner inntektene kunne vore mykje større utan den nye lakseskatten.
– Forventningane i forkant av årets auksjon, før forslaget om grunnrente vart lagt på bordet, var meir enn det dobbelte. Ein har med andre ord tapt rundt fire milliardar, seier administrerande direktør i Sjømat Norge Geir Ove Ystmark til Ilaks.
Han baserer dette på analysar frå lakseauksjonen i 2020 og tal frå analysebyrået Kontali.
– Selskapa hadde bydd mykje meir, dersom ikkje grunnrenteforslaget låg på bordet, hevdar Ystmark.
Det er Nærings- og fiskeridepartementet som auksjonerer nye løyve for oppdrett av laks, aure og regnbogeaure ut frå kva dei reknar som miljømessig forsvarleg. Sjømatbedriftene og Sjømat Norge hadde bedt om at auksjonen vart utsett på grunn av forslaget om å innføre grunnrenteskatt på havbruk.
Reaksjonane på forslaget har vore sterke frå næringa. Sjømat Norge var raskt ute og skulda Ap og Sp for «å slakte Noregs viktigaste framtidsnæring», «sløkkje lysa i vindauga langs kysten», og «tvinge arbeidsfolk til å henge arbeidsdressen på kroken».
Geir Pollestad, Senterpartiets fremste finanspolitikar, beskreiv tidlegare i månaden sjømat- og laksenæringa som «ein veldig mektig lobbyorganisasjon».
– Lobbyistane har sikta seg inn på Senterparti-ordførarar for å stanse den nye lakseskatten til regjeringa. Det vil dei ikkje klare, sa Pollestad til NTB.
(©NPK)
