Millionhjelp til ny hytte

— Ho skal stå ferdig før vinteren, men i kva årstal veit eg ikkje.

Prosjektleiar Erlend Flotve har målet — ei ny lagshytte til bortimot sju millionar kroner — tydeleg i sikte. Om det enno er fjernt, tok laget eit aldri så lite sjumillionsssteg nærare då meldinga frå Sparebankstiftelsen SR-Bank kom i november: Prosjektet er tildelt éin million kroner.

Som HF skreiv tidlegare i år, er den gamle hytta — Dyrbu — i så dårleg stand at hjelpekorpset meiner ho hemmar rekruttering.

Kake, kaffi og kroner

Tysdag kom representantar for SR-Bank til lagshuset i Øystese for å overrekkja det innramma gåvebrevet som symboliserer løyvinga. I retur fekk dei kaffi og kake. Til stades var også fleire representantar for lokallaget og fungerande distriktsleiar i Hordaland Røde Kors, Thorbjørn Fosse.

— Dette er fantastisk. Eg har vore stor fan av prosjektet frå starten, av to årsaker. Det handlar om beredskap i fjellet, men kanskje endå meir om at dette kan verta ei hytte alle i lokalsamfunnet kan bruka for å styrkja friluftslivet og få born og unge ut i naturen, seier Fosse.

Mariann Bjorøy og Morten Skaathun Nilsen, banksjefar på lokalkontora til SR-Bank i høvesvis Åsane og Fana, overrekte sjekken på vegner av stiftinga. Bjorøy seier vert prioritert å løyva pengar til prosjekt som det verkar realistisk å gjennomføra. Dessutan legg stiftinga vekt på mellom anna samarbeid og aktivitet for born og unge.

— Synergi er flott. Ein kan hjelpa kvarandre og få meir til i staden for å sitja på kvar si tue, seier ho.

Prøver seg på fleire

Lokallaget søkjer om stønad også hjå fleire andre stiftingar, og gjer i fyrste omgang ein framstøyt mot dei større verksemdene i området. Når ein etter kvart vonleg nærmar seg målet, kan også dei mindre rekna med å få sjansen til å bidra.

Vona er at når den fyrste store løyvinga er i boks, vil andre fylgja etter. Laget har sett av 500.000 kroner i eigenkapital til prosjektet, pluss ein omfattande eigeninnsats.

Leiar i Øystese Røde Kors, Andreas Jacobsen, er svært takksam for gåva frå stiftinga. Han opplyser at laget har inngått intensjonsavtalar med dei vidaregåande skulane i Kvam om at dei skal bruka hytta til mellom anna bli-kjent-turar for elevane. Slike turar var vanlege tidlegare både i ungdomsskulen og vidaregåande skule, men hytta har ikkje vore eigna til denne bruken dei siste åra.