— Middel mot økonomisk kriminalitet
Fleire har ytra seg kritisk på Facebook om at nettbanken til Sparebanken Vest krev at kundane fyller ut eit spørjeskjema om inntekt og verv før dei får tilgang til nettbanken.
Ei kvinne reagerer i fjesbokgruppa Kvardagsprat i Kvam på at ein må gje frå seg slik informasjon, og spør om dette ikkje er å dra det vel langt.
Avdelingsbanksjef i Sparebanken Vest, May Turid Tømmervik, forklarar at styresmaktene krev at bankane har oppdatert informasjon om identiteten og bruksmønsteret til kundar for banktenestene. Informasjonen er ein viktig lekk i å motarbeida økonomisk kriminalitet. Bankane skal vita kvar pengar kjem frå og kva trong den enkelte har til dømes for kontantinnskot og utanlandsoverføringar.
Ifølgje Tømmervik må kundane difor med jamne mellomrom svara på spørsmål før dei skal logga seg inn i nettbanken eller appen.
— Kundane våre kan vera trygge på at informasjonen dei deler med oss, vert handsama på ein sikker og konfidensiell måte i samsvar med rutinane til banken for personvern og informasjonstryggleik, forsikrar ho.
Det eine spørsmålet kundane må svara på er kva «føremålet» med inntekta er. Ifølgje Tømmervik tyder spørsmålet kvar kundane får inntektene frå.
— Informasjonen er med på å danne totalbildet av kunden og korleis han eller ho vil bruka banktenestene våre. Difor spør me om dette.
