Meteorologane: Grått og dårleg skiføre i sør – best vêr i nord
Medan langrennseliten smør skia klare til sesongstart på Beitostølen, må glade amatørar elles i landet smørje seg med tolmod. Dei fleste stader er det lite snø i vente.
Ingvild Flugstad Østberg og andre eliteutøvarar gjer seg klare til å sesongdebutere på Beitostølen denne helga, men Ola og Kari nordmann må halde fram med å vente på skiforhold som inviterer til å spenne på seg skia.
– Det er eventuelt i områda i Agder dei største snømengdene vil komme, seier Marit Berger, vakthavande meteorolog ved Meteorologisk institutt til NTB.
Artikkelen held fram under annonsen.
Ifølgje Meteorologane på Twitter kan det bli litt snø i indre og høgare strøk i delar av Austlandet og i Agder. Frå torsdag kan det komme rundt fem centimeter snø på 24 timar.
Men om det blir nok til at ein kan finne fram skia, er ei anna sak. Snøgrensa vil liggje mellom 200 og 500 meter.
Ikkje nødvendigvis gode nyheiter
Ifølgje Berger vil vêret vi har før helga, stort sett halde seg gjennom helga. Dette gjeld over heile landet.
For folk på Austlandet og Sørlandet er ikkje det nødvendigvis gode nyheiter. Det er her nedbøren stort sett vil komme dei neste dagane.
Berger leitar etter moglegheiter for sol, noko som verkar som ei vanskeleg oppgåve i desse områda.
– Det er kanskje lengst nord på Austlandet, kanskje rundt Trøndelag. Men det vil nok stort sett vere slik det er i dag. Grått vêr, seier meteorologen.
I tillegg blir det mykje vind i delar av Rogaland og på Vestlandet, med vindkast på 27 til 30 meter per sekund.
Denne vinden gir seg ikkje med det første, så lause gjenstandar som ikkje allereie har blåst bort, kan vere lurt å sikre snarast mogleg.
Artikkelen held fram under annonsen.
Best vêr i nord
Austavind gjer at det blir finare vêr på vestsida av fjella – og at det gode vêret blir å finne lenger nord.
– Jo lenger nord på Vestlandet du kjem, til Møre og Romsdal, og i Midt-Noreg og Nord-Noreg, så blir det eigentleg ganske fint, seier Berger.
– Det blir veldig fint mange stader. For dei i nord er det ikkje veldig lenge til mørketida set inn, så det kan vere siste sjanse for å sjå sola på ei stund, seier meteorologen før ho legg inn eit lite atterhald.
– Skyene speler på lag, med unntak av områda aller lengst i nord og aust i Finnmark. Her blir det kanskje litt meir skyer i periodar.
(©NPK)
