To tilsette i Ullensvang kommune har fordelt 2 millionar kroner til 12 leikeplassar, badeplassar og ballbingar. 3 av dei ligg i Jondal: Svåsandhagen Fellesskap fekk 400.000 kroner til leikeplass i bustadfeltet mellom Solesnes og Svåsand, som var mest av alle. Torsnes Ungdomslag fekk 265.000 kroner, som er 3. mest. I tillegg vart det delt ut 50.000 kroner til ein leikeplass i Flåten byggjefelt i Jondal.
Det vart søkt om nær 4,7 millionar kroner. Den einaste søkjaren som ikkje fekk stønad, var Herand Båtlag. Laget søkte om stønad til oppgradering av huset med kiosk og toalett ved båthamna. Duoen som fordelte pengane – verksemdleiar Hjalmar Heimvik og fagleiar Egil Dvergsdal i verksemd for veg, park og hamn – meiner at søknaden ikkje stettar kriteria for søknadsordninga.
Mellom kriteria var at tiltaket er ope for alle, involverer frivillige krefter og born og unge, inneber apparat som stimulerer til variert leik og har ein plan for vedlikehald, drift og finansiering.
Det var i juni kommunestyret sette av pengar frå 2023-overskotet til ordninga.
