Merkar at festlysta har minka

– Me satsar hardt på julebord. Hos oss har julebordsesongen vore ganske bra, fortel hotelldirektør Erlend Espedal Lundblad ved Hardangerfjord Hotel AS.

Medan det har vore ein nedgang i talet på bergensarar som kombinerer julebord med overnatting, har talet på lokale gjester auka.

– Julebord med overnatting kostar. Kanskje gjer den økonomiske situasjonen i Noreg at fleire vel ei rimelegare løysing? seier han.

Hotellet har sett av seks helgar til julebord, og brukar både Fjordtindsalen og restauranten. Når begge er fulle, er det nærare 300 gjester.

– Juleborda er ei viktig inntektskjelde mot slutten av året. Utan juleborda hadde det vorte vanskeleg, seier Lundblad.

– Ganske roleg

Hos Thon Hotel Sandven er julebordssesongen rolegare enn vanleg, fortel hotelldirektør Marie Skutlaberg Kjøsnes.

– Me har ikkje satsa så hardt på julebord, og har berre sett av to laurdagar til full julebuffé. I fjor hadde me tre, fortel ho.

I staden ønskjer hotellet ein jamn straum med middagsgjester heile veka.

– Dei kjøper gjerne ein juletallerken. Dette gjev mindre matsvinn enn om me lagar buffé. Me er opptekne av å unngå matsvinn, seier Kjøsnes.

Hennar inntrykk er at julebordsinteressa er mindre i nokre bransjar enn i andre.

– Me har til dømes ikkje sett mykje til verksemder frå byggjebransjen. Om dette skuldast økonomien eller andre ting, veit eg ikkje, seier ho.

Christer Økland, direktør for mat og drikke i Fjordtind Hotels AS, svarar når HF ringjer Hardanger House i Jondal og spør om julebordssesongen. Årsaka er at han og driftsdirektør Tina Våtvik Olsen er konsulentar for hotellet, og tek eit tak medan hotellet ventar på den nye daglege leiaren.

– Det har vore godt med julebord hos Hardanger House. Lokale verksemder held oss i aktivitet. Det er me glade for. Julebord er ikkje eit stort satsingsområde. Dei eksklusive fasilitetane gjer at hotellet satsar i det små, fortel Økland.

Hans inntrykk er at julebordsesongen hos Hardanger House har vore om lag som i fjor.

– Byter julebord med «julibord»

Holmatun AS plar invitera til eitt julebord kvar sesong. Medeigar Eirik Kvarv fortel at interessa for julebordet har vore mindre enn tidlegare.

– Endringa er ikkje enorm, men me merkar den. Det verkar som om folk er litt meir forsiktige. Det kan skuldast at det meste har vorte dyrare, men me har ikkje merka mindre interesse for dei andre arrangementa våre, seier han.

Barmen AS har planlagt to julebord i år. Også dagleg leiar i Barmen AS, Espen Raknes, har merka ei endring.

– Det ser ut til å verta litt mindre folk enn vanleg. Me prøver å halda prisen så låg som mogleg, slik at flest mogleg skal kunna unna seg eit julebord, seier han.

Raknes ser ein tendens til at verksemder flyttar juleborda til andre delar av året.

– Nokre arrangerer til dømes «julibord» i staden for eit julebord, seier han.

– Vel catering

Steinstø Kakebu AS arrangerer julebord i kjellaren til Folkets Hus i Ålvik. Samstundes leverer verksemda julemat til verksemder og privatpersonar. Ifølgje dagleg leiar Heidi Steinstø Helgheim er det størst etterspurnad etter det siste.

– Sesongen ser eigentleg bra ut. Mange vil ha julemat utan å måtta laga den sjølv. I alle fall ikkje når dei er fleire enn ti personar, seier ho.

Julebord i Folkets Hus er nytt av året. Helgheim har difor ikkje tidlegare år å samanlikna med. Ho har heller ikkje talt kor mange julebord det har vore i kjellaren.

– Eg er for oppteken med å laga mat til å telja slikt. Det har vore ein del, men ikkje veldig mange. Eg håpar tilbodet vert betre kjent til neste år, seier ho.

Helgheim ser ikkje bort frå at inflasjon og høge renter gjer at fleire vel catering enn julebord.

– Catering er det rimelegaste alternativet, seier ho.

– Har plass til fleire

Hardingasete arrangerer fire julebord denne sesongen. Talet på gjester varierer frå 8 til 60, fortel dagleg leiar Marita N. Valland.

– Me er litt avhengige av juleborda, og hadde hatt plass til fleire gjester. Det var travlare i fjor. Kanskje har folk og verksemder mindre å rutta med i år, eller kanskje har me marknadsført oss for dårleg? Kanskje må me finna på nokre sprell for å få fleire gjester til neste år, seier ho.

Sjølv om tilreisande dominerer arrangementa resten av året, er julebordsgjestene stort sett lokale.

– Av dei 22 bryllaupa me hadde i år, var 20 av para tilreisande. Me ser knapt ein bergensar på juleborda på Hardingasete, seier Valland.