Melder frå om kvardagsproblem
Det kan vera vanskeleg å stoppa på glatta framfor gangfeltet i krysset mellom Nedre Vik og fylkesveg 79 i Øystese.
Det har yrkessjåførane i Jan Mo AS meldt frå om i eit innspel til den kommunale trafikksikringsplanen. Kombinasjonen av ein trafikkert hovudveg, gangfelt, mjuke trafikantar, dårleg siktsone og bakke utgjer eit problem. Ein må heilt fram i krysset for å sjå om det kjem bilar frå aust, påpeikar verksemda.
Når det gjeld vintervedlikehald, ber Jan Mo om at trafikkerte vegar ved barnehagane vert brøyta og strødde før barnehagane opnar. Ein bør ikkje samla snødungar i vegkryss, slik det har vore gjort i mellom anna Sandvenhagen i Norheimsund og utkøyringa frå Furedalen på Kvamskogen, meiner sjåførane.
Transportfirmaet ber elles om at det vert rydda og felt tre for å få betre sikt ved kraftstasjonen i Ytre Ålvik, og meiner trefelling er naudsynt ved den gamle røyrgata i Ytre Ålvik.
I Vikedal i Ålvik er det ikkje passering for to store køyretøy, og eit 40-skilt står for nær vegkanten, meiner sjåførane. I Øystese er det ikkje tilstrekkeleg plass til møtande køyretøy på brua over Vikelva, opplyser Jan Mo.
