Melde medisintjuveri til politiet
Medisinar er forsvunne frå kommunehelsetenesta i Kvam.
HR-sjef i Kvam herad, Kari Sagen, fortel at ei medisinteljing avslørte at medisinar hadde forsvunne frå ein institusjon i Kvam i februar. Ho vil ikkje seia kvar medisinane er forsvunne, kor mykje medisinar eller kva medisinar det er snakk om.
– Saka er sjølvsagt meld til politiet, og eg kan ikkje seia så mykje meir enn at den er under etterforsking, seier Sagen.
Politioverbetjent Andor Helgheim ved Kvam politistasjon stadfestar at saka vert etterforska. Han ønskjer ikkje å seia meir om saka.
Sidan ein tilsett er mistenkt, er saka rutinemessig meld til Statsforvaltaren i Vestland. Der er meldinga, i motsetnad til i Kvam herad, journalført og gjort kjend på postlista. Sagen opplyser at årsaka til at det ikkje ligg i den kommunale postlista, er at dokumentet ligg i ei personalmappe. HF bad 14. mars om innsyn i det.
