– Meld frå om du køyrer på vilt
Det har vore rekordmange viltpåkøyrslar i år. No ber forsikringsselskapa bilistane melde frå, og minner om at ein ikkje risikerer bonustap.
I perioden 1. april–31. mars i 2022 og 2023 vart 7270 rådyr drepne av bil, ifølgje SSB. Det er 7 prosent fleire enn året før. I tillegg kjem påkøyrsler av elg og hjort, skriv forsikringsselskapet Fremtind i ei pressemelding.
– Det er viktig å melde frå om eit dyr er påkøyrt, for å kunne vareta dyret på ein forsvarleg måte. Dyret kan vere skadd eller må avlivast, seier skadeførebyggjar Therese Hofstad-Nielsen i Fremtind.
Artikkelen held fram under annonsen.
– Du vil ikkje få bonustap hos oss når påkøyrselen blir meld til politiet eller viltnemnda. Eigendelen vil også bli redusert med opptil 6.000 kroner, forklarar Hofstad-Nielsen.
Dei aller fleste som køyrer på eit dyr, er klar over ansvaret sitt, men skadeførebyggjaren meiner likevel vi må ta høgd for at det finst mørketal.
– Nokre kjenner kanskje ikkje til kravet om å melde frå. Andre trur kanskje at det vil koste dei dyrt. Men du har ingenting å tene på å ikkje melde frå om at du har køyrt på eit dyr. Det er ikkje straffbart å køyre på eit dyr, men det er straffbart ikkje å melde frå, seier skadeførebyggjaren.
Dette gjer du om du køyrer på eit dyr
• Set på varsellys, plasser bilen på ein måte som ikkje skaper farlege situasjonar i trafikken og ta på deg refleksvest. Sett ut varseltrekant. Kontakt nauddhjelp først viss det har skjedd ei alvorleg ulykke.
• Meld frå til politiet på tlf. 02800. Politiet vil varsle viltnemnda, som er ansvarleg for å ta seg av skadde eller daude dyr. Hugs også å merke deg kvar du er og kvar dyret forsvann, til dømes ved å setje opp mellombelse merke eller ta bilete av området.
(©NPK)
