Meir enn mekking

Mange i Kvam opplever kanskje at bilmiljøet kan vera litt uoversiktleg og ukjent. I alle fall veit dei som ikkje er med i miljøet, som regel veldig lite om det. Ifylgje dei me har snakka med som er med i miljøet, er det ein veldig inkluderande gjeng som skrur på bilar saman.

Bak YX-stasjonen i Steinsdalen ligg ein liten verkstad der Christoffer Øystese oppheld seg på fritida. Dette er ein stad der hobbymekanikarar kjem for å skru på køyretøya sine. Det er ikkje berre ein verkstad, men også ein hengeplass for mange, fortel Øystese.

Skatt i ei løe

For nokre år sidan vart det funne ein Renault 18 frå 1970-talet i ei løe. Dette køyretøyet vore det store prosjektet til Christoffer dei to siste åra, og bilen har stått her i Kvam motorsportsenter sine lokale. Øystese satsar på at bilen står klar og ferdig restaurert til neste sesong, seier han, og ser stolt på den beige veteranbilen sin.

Øystese har alltid vore interessert i bilar og skruing, så det var sjølvsagt at han skulle bli medlem i motorsportsenteret. No har senteret rundt 70 medlemer.

Mange brukar lokala til å ta sørvis eller byta dekk på eigne bruksbilar, men det er også mange som har prosjekt ståande i verkstaden. Dei som betaler den årlege avgifta, kan bruka alle verktøy som er tilgjengelege og kan lagra eitt sett med dekk i dekkhotellet.

– Godt miljø

Senteret har medlemer er heilt nede i 17-årsalderen. På sommaren er det ofte mange som kjem og «heng», fortel Øystese. Og mange har det som ein møtestad på kveldane, seier han.

Dei har både kjøken og nokre oppvarma brakker til disposisjon for medlemene. Han meiner at bilmiljøet i Kvam er ein god plass å vera, ein plass der ein tek vare på kvarandre.

– Det er sjeldan eg er der åleine. Det kjem alltid nokon innom, fortel Viljar Sætveit, som er medlem i motorsportsenteret.

Han seier at det er eit godt miljø og at det er betre enn mykje anna ein kan gjera på.

Journalistane er mediefagelevar på Framnes Kristne Vidaregåande Skule. Red.