Meiner Ullensvang bør ta solidarisk ansvar
Ullensvang bør vurdera å ta imot born frå Moria-leiren, meiner Raudt.
I ein interpellasjon til kommunestyremøtet onsdag tek Terje Kollbotn (Raudt) til orde for å drøfta kapasiteten til å ta mot flyktningborn, og å laga ein plan for busetjing av og tilbod til dei ein tek imot.
Kollbotn føreslår at kommunestyret vedtek å utarbeida ein plan for integrering og antirasisme og gjer Ullensvang til antirasistisk sone. I tillegg ynskjer han å senda ei klar melding til Stortinget om at kommunen tek avstand frå innskrenkingane i asylpolitikken dei to siste regjeringsperiodane.
Kollbotn meiner forholda som flyktningane lever med i Moria-leiren på Lesbos i Hellas, er umenneskelege. Den norske regjeringa har etter hans syn prova at ho ikkje vil ta eit internasjonalt, solidarisk ansvar for flyktningane, særleg under koronakrisa.
Han meiner Ullensvang har både kapasitet og vilje til å vera med på ein dugnad og ta imot born frå leiren.
– I ein kommune med fallande folketal vil det vere ei progressiv satsing å bli ein inkluderande og mangfaldig kommune som er med på ein internasjonal dugnad for busetjing av flyktningar og asylsøkjarar, skriv Kollbotn, som spør om ordføraren vil ta initiativ i saka.
