Meiner trongen bør sjekkast
Tone Mo bør fyrst finna ut om skulane og barnehagane ynskjer ein besøksgard ved Fyksesund.
Det er sjeldan kost at rådmannen i Kvam herad rår frå å gje søkjarar stønad frå kraftfondet, men Tone Mo har fått den lagnaden. Rådmannen meiner det er grunn til ikkje eingong å yta den rutinemessige etableringsstønaden til ei satsing på besøksgard.
– Garden ligg ikkje særleg sentralt, og det er ei utfordring, skriv rådmannen.
Ho skriv i saksutgreiinga at Mo, før ho investerer, bør sjekka om barnehagar og skular er villige til å kjøpa tilbodet. Planen hennar er å restaurera ei løe, starta kafé og utsal av suvenirar og gardsprodukt og visa fram dyr til både skule- og barnehageborn som treng alternative tilbod og til andre som kjem innom. Garden har i dag kaninar, høner, hanar og geiter.
Prosjektet er kostnadsrekna til 800.000 kroner i perioden 2024–2026. Mo har søkt om 180.000 kroner frå kraftfondet. Dei skal gå til restaurering og marknadsføring.
Formannskapet drøftar søknaden 7. november. Heradsstyret avgjer saka 14. november.
