Meiner leirskule er umogen
To av tre frå Jondal som har meldt seg på i kampen om tilskot frå det kommunale næringsfondet, kan få avslag.
I alle fall er det tilrådinga frå rådmannen til utval for samfunn, plan og næring, som drøftar saka onsdag.
Den eine søkjaren er Hardangerakademiet, som planlegg å etablera leirskule i Jonatunet. Rådmannen vil ikkje yta stønad til prosjektet, som har ei kostnadsramme på 580.000 kroner. Søknaden lyder på 250.000.
– Det er positivt at søkjar ynskjer å utvikla sin aktivitet med nye tilbod. Det vil vera svært positivt om det kan utviklast for meir kommersiell aktivitet i bygget. For å kunne lukkast med ei kommersiell utvikling i verksemda, vil det vera naudsynt med ein god forretningsplan, skriv rådmannen.
Han tilrår akademiet å kontakta Næringshagen i Ullensvang AS for å få hjelp til å laga dei naudsynte dokumenta, og heller søkja på nytt seinare.
Lars B. Brattabø har søkt om stønad til kjøp av mjølkekvote. Rådmannen vil gje avslag av di kostnadsramma for tiltaket, 5.456 kroner, er monaleg under minstegrensa. Sverre Leo Handegard, derimot, har kryssa denne grensa med si ramme på vel ein halv million kroner for kjøp av 37.363 liter. Rådmannen føreslår å løyva 50.000 kroner.
I alt kom 14 søknader om vel 3,5 millionar kroner i denne søknadsrunden. Kommunen disponerer om lag 1 million kroner i halvåret.
