Meiner gammal hytte går på tryggleiken laus

Det seier Jarle Flotve, som er medlem av Øystese Røde Kors Hjelpekorps. Laget ønskjer å riva den gamle hytta og byggja ei ny og større hytte på same staden.

Den om lag 120 kvadratmeter store hytta vart bygd på 1960-talet. Sidan har den fleire gonger vorte bygd ut på dugnad.

– Hytta har skeive søyler og til tider blæs det snø inn. Den er så gammal at det ikkje er verdt å bruka tid og pengar på å halda den ved like. Det er mykje betre å byggja ei ny hytte og i staden bruka ressursane på beredskaps- og redningsarbeid, seier Flotve.

Hindrar rekrutteringa

Ikkje berre er vedlikehald av den gamle hytta krevjande. Flotve fryktar at den hindrar rekrutteringa. Han fortel at det vert vanskelegare og vanskelegare både å få eldre og rutinerte medlemer til å halda fram i laget, og å rekruttera unge medlemer. Undersøkingar laget har gjennomført, tyder på at standarden på lagshytta er ei av årsakene til dette.

– Eldre medlemer har gjerne familie dei vil prioritera i helgar og høgtider. Dersom lagshytta har plass til familiemedlemer, vil det verta lettare å få eldre og erfarne medlemer til å halda fram i laget. Yngre medlemer har andre krav til standard og fasilitetar enn det som var vanleg då hytta vart bygd. Den gamle hytta har mellom anna utedo. Sjølv om våre medlemer toler å gå ut for å gå på do, er det ikkje like triveleg å invitera familiemedlemer med på hytta når fasilitetane er slik dei er, seier Flotve.

Flotve meiner trongen for innsatsen til hjelpekorpset er større enn nokon gong.

– Det har dukka opp mange turisthytter i vårt område dei siste åra. Dermed er aktiviteten i fjellet langt større enn den var då hytta i Hamlagrø vart bygd. Me har hatt ein del krevjande aksjonar på vinterstid. Terrenget er vanskeleg å ferdast i, og det er viktig at me har folk som er erfarne, engasjerte og lokalkjende. Dersom den gamle hytte gjer rekrutteringsarbeidet vårt vanskeleg, gjer den det meir utrygt å ferdast i fjellet, seier han.

Større og betre

Den nye hytta er framleis på planleggingsstadiet. Laget ønskjer ei hytte med eit bruksareal på 250 rutemeter. Hytta skal mellom anna ha ein 50 kvadratmeter stor garasje til snøskuter og anna utstyr i underetasjen. Ein slik garasje vil gjera det lettare å halda utstyret ved like og vera med på å sikra at utstyret verkar den dagen det er bruk for det.

– Me ønskjer ei hytte der det er triveleg å vera, samstundes som den er lett å bruka til aksjonar dersom noko skjer, seier Flotve.

Tidlegare var det ikkje uvanleg at laget leigde ut hytta både til medlemer og andre. Det har det vore lite av dei siste åra. Ei ny hytte kan generera inntekter ved at fleire ønskjer å leiga den.

Skjer i sjøen

Flotve reknar med at det vil kosta tre–fire millionar kroner å byggja ei ny hytte. Pengane håpar laget å få frå ulike stønadsordningar og frå private sponsorar. Før søknadene kan sendast, må byggjeløyvet vera på plass.

Arealdelen til kommunedelplanen krev at bygg i området ikkje skal ha eit bruksareal som er større enn 120 kvadratmeter. Hjelpekorpset har søkt om dispensasjon. Rådmannen vurderer at saka råkar statlege og regionale interesser, og har valt å senda søknaden på høyring.

Når ny hytte eventuelt kan stå klar, er Flotve usikker på.

– Me håpar det skal skje så fort som mogleg, men det er ein seig prosess me må gjennom. Det går an å drøyme om at me kan byrja byggja neste sommarhalvår, men mykje må klaffa om det skal skje, seier han.