Med lidenskap for lastebil

Ekteparet Mark og Gea Slinger bur midt i Nederland, men i tre veker om sommaren har ekteparet ein hobby utanom det vanlege. Dei pakkar i den gamle Scania-lastebilen sin og reiser rundt på treff over heile kontinentet.

– For oss er det ein fin måte å få oppleva nye stader på, seier Mark.

Årets tur starta med eit treff i heimlandet, før paret sette kursen mot nord. I Tyskland møtte dei eit venepar med den same interessa, og saman med dei besøkte Slinger eit stort lastebiltreff i byen Silkeborg i Danmark. Den siste veka av turen nyttar dei altså i Noreg, med stopp på Torsnes. Det er den beste måten å feriera på, meiner paret.

Tidlegare lastebilsjåfør

Og hobbyen er ikkje teken heilt ut av det blå. Då Mark var 20 år gamal, tok han førarkort for lastebil og byrja som lastebilsjåfør. Den jobben hadde han fram til han ikkje orka meir i 40-årsalderen. No jobbar han på kontor for eit busselskap i Nederland.

– Men eg kunne aldri tenkja meg å køyra buss. Det er for mykje bråk, seier han og ler.

Då han slutta i sjåførjobben, hadde paret ein bubil, men dei to fann raskt ut at dei kunne byggja noko betre. Som fagmann visste Mark at han ville ha ein bil som brukte lite drivstoff og som han enkelt kunne bygga om. Valet fall på ein Scania med ni liters motor. Den brukar berre to liter på mila, noko som er bra for ein 30 år gamal lastebil.

– Det har vorte ein dyrare hobby. Det merkar me alle, seier Mark.

På lasteplanet har Slinger teke fram sin indre handverkar. Der har han laga plass for sofa, kjøkenkrok, bad med dusj og stor seng. No kan han aldri tenkja seg å gå tilbake til ein vanleg bubil. I lastebilen er det høgare under taket, senga er større og det er meir varmtvatn.

– Me er sjølvforsynte med mat, straum og vatn i ti dagar, seier Mark.

Bakpå «skapet», som det heiter, har paret moglegheita til å opna døra rett inn til senga. Det kan det bli mange flotte soloppgangar og -nedgangar av.

– Særleg rundt Middelhavet søv me med henne open, seier Mark.

Heldige med vêret

Ein ting nederlendarane skryter av med treffet, er vêret. For to år sidan vitja Mark Torsnes åleine, og då regna det tett. Kona var glad for at ho vart med då Hardanger bada i sol.

– Det er så vakkert her, seier ho.

I tillegg til å møte likesinna i industriområdet på Torsnes har paret fått oppleva litt av det Jondal har å by på. Bakpå lastebilen har duoen nemleg ein garasje der motorsykkelen deira «bur». Laurdag var dei to på tur til Folgefonna Sommarskisenter.

– Det er ein heilt magisk tur i dette vêret, seier Mark.

Også bakkane og gardsbruka i Krossdalen imponerte paret. Sist Mark var i Jondal, var det monaleg gråare i vêret, så han er glad han fekk sjå bygda bada i sol.

Stort i heimlandet

Ekteparet seier at interessa for lastebilar er veksande i Nederland. Det er særleg yngre menn i 18–20-årsalderen som får augo opp for både nye og gamle lastebilar. Treffet dei to var på før reisa nordover, trekte mange folk.

– Det er fint å sjå at dei yngre fattar interesse for lastebilar.

Mark seier at Facebook har gjort det enkelt å få med seg kvar og når det er treff. Dei to har reist gjennom nesten alle europeiske land, både i samband med treff og på vanleg ferie. Når ein er innom treff, møter ein mange likesinna, påpeikar dei.

På kveldane sit dei til langt på natt i godt lag og pratar saman med andre entusiastar. Der kjem det mange røvarhistorier, men også fakta som imponerer. Mark nemner mellom anna ein eldre kar frå Haukeli som har kjøpt tilbake ein lastebil som bestemora hans fekk fatt i etter krigen. No har han restaurert bilen og reiser rundt på treff med han.

– Det er sprekt gjort! seier Mark.

– Mindre, men like bra

Arrangør Stig Tore Anthun seier at Hardangerfjordtreffet har gått som planlagt. Det har vore god stemning blant dei tilreisande, sjølv om det har vore litt færre enn tidlegare år. Årets treff kjem nemleg sist av ei lang rekkje med liknande treff. Difor er det enkelte som allereie har fått sin dose for i år.

– Me er nøgde med dei som kom valde å koma, seier Anthun.

Veteranlastebilmiljøet er råka av prisveksten, så det er fleire som må prioritera mellom ulike hobbyar. For enkelte kan reisekostnadene verta for store.

For Mark og Gea Slinger vert nok ikkje årets utgåve den siste dei deltek på.

– Me håpar det er like fint vêr neste gong me kjem, seier Mark.