Med i VM på sykkel frå stova

Det resulterte i 27.-plass under Road Worlds for Seniors, verdsmeisterskapen i sykling for seniorar. Til samanlikning er det litt over 3.000 kilometer å gå Noreg på langs.

Konkurransen starta 7. oktober og vart avslutta 1. november. 6.913 syklistar frå 10 land deltok i tevlinga. Totalt sykla dei 333.230 kilometer, eller 8 rundar rundt jorda.

Strandebarm Seniorkrutt hadde 14 deltakarar frå Strandebarm omsorg. Aktivitør Alis Marlen Augestad Ljones seier at helsevinsten er den største fordelen med syklinga.

– Dei vert sterkare i beina. Éi seier at ho har gått ned i vekt. Ein som har slite med å gå, har byrja å gå litt igjen. Nokre seier dei har fått betre balanse. Så det er heilt supert, seier Ljones.

– Kan sykla forbi huset sitt

I kvinneklassen kom den best plasserte frå Strandebarm på 29.-plass. Ho sykla 929,4 kilometer. I herreklassen vart beste plasseringa 50. plass, etter å ha sykla 644,6 kilometer.

Fleire av syklistane har sykla to–tre timar kvar dag i konkurranseperioden. Nokre sykla seg gjennom ein video, medan andre sykla fleire etter kvarandre. Dei ivrigaste sykla frå klokka 10 til lunsj klokka 12, og var tilbake på sykkelen att på ettermiddagen.

Videoane det vert sykla etter, er filma rundt om i verda. Kvar film varar mellom 20 og 30 minutt. Ifylgje Ljones er det om lag 20 videoar frå Kvam i filmbiblioteket.

– Det er fint for dei demente. Dei kan sykla forbi huset sitt eller andre stader dei kjenner frå nærområdet, seier Ljones.

– Kan sykla med armane

Sykkelfilmane vert brukte resten av året òg, men får ekstra merksemd under verdsmeisterskapen. Ljones seier det er fint å sjå samhaldet mellom dei eldre som syklar for å nå eit mål. Ho byrja arbeida ved Strandebarm omsorg i 2022, og seier det er tredje gong ho har vore med på arrangementet.

I fjor vart det 35.-plass i konkurransen. Målet var å slå det i år. I tillegg var det viktig å slå deltakarane frå Øystese, seier Ljones.

– Syklinga er bra for humøret, muskulaturen og blodomløpet, seier ho.

Sjølv om ikkje beina verkar, kan alle delta. Det er mogleg å bruka beina, armar og bein eller berre armar, forklarer Ljones. Ho fortel at mange av deltakarane vert bitne av basillen og held fram med syklinga til og med etter at konkurransen er avslutta.

– Dei synest det er kjekt og vert veldig ivrige. Ein ser at dei som er litt flaue og beskjedne, har lyst til å vera gode, seier Ljones.

Tre VM-medaljar

Nokre av syklistane har vore med tre gongar. Grensa for å få godkjent at ein har delteke er berre éin kilometer, slik at flest mogleg skal verta motiverte.

Alle deltakarane fekk medalje og diplom under medaljeseremonien på institusjonen 8. november.

– Eg snakka med ein eldre kar, og sa til han at det ikkje er mange som kan seia at dei har tre VM-medaljar. Då fekk eg eit fint smil, seier Ljones.

Prestasjonen vart feira med kake og gratulasjonar. Aktivitøren fortel at deltakarane skal få ein sykkelpause no.

– Dei har konkurranseinstinkt. Nokre vil ikkje sykla utan å ha ein motivasjon for det, så kanskje me må laga til ein konkurranse mellom avdelingane og dei som vitjar dagsenteret, seier Ljones.