– Me som foreldre må henga med
Det var ikkje stort oppmøte då Kvam E-Sport inviterte nysgjerrige vaksne til informasjonskveld laurdag ettermiddag.
Om det var finvêret som stoppa vaksne i å gå inn i det litt mørke lokalet i Nedre Vik, er uvisst. Brigt Lillevik Botnen, som var med på å starta e-sportsklubben, trur mange foreldre er skeptiske til dataspel. I alle fall om ikkje foreldra sjølve har drive på med det. Myten om dei firkanta auga har nok mange høyrt.
Monica Flatabø, som var den einaste som møtte opp på informasjonsmøtet, meiner foreldre må henga med på dataspel på same måte som at ein fylgjer borna til fotballtrening eller anna.
– Samstundes har me som foreldre eit enormt ansvar for nettvit og for å læra borna om mobbing og andre skumle farar. Det er naturleg at me er skeptiske, seier Flatabø.
– Søvn er viktig
For å vera med på treningane til Kvam E-Sport, må ein minimum gå i 6. klasse. Sonen til Flatabø byrja i 6. denne hausten, og har vist interesse for dataspel. Fredag var han på prøvespeling, og laurdag nytta mor høvet til å setja seg meir inn i kva Kvam E-Sport tilbyr.
– Sidan han ville byrja på det, ville eg vita meir om kva dei held på med, kva det er og om kva ein kan bidra med som forelder, fortel Flatabø.
Styremedlem Botnen og styreleiar Daniel Olsen hadde førebudd eit føredrag. Dei fortalde mellom anna om fokuset på sunt kosthald, aktivitet og god søvn. Alt påverkar reaksjonsevna og konsentrasjonen, som ifylgje karane er svært viktig å ha med seg om ein ynskjer å satsa på e-sport.
– Kjenner seg att
Flatebø synest Kvam E-Sport er eit kjempefint tiltak. Det at borna både får spela saman og vera sosiale, og at dei legg opp til fysisk aktivitet, tykkjer ho godt om.
– Er du redd for for mykje speling?
– Er ikkje alle det? Er det ikkje det me kjenner i magen når me ser at dei framleis sit med skjermen? spør ho.
Dei gongane Flatabø høyrer at «eg skal berre nett», og det til dømes vert byrja på noko nytt i spelet, kjenner ho seg litt att som vaksen.
– Når du held på med noko du er interessert i og ungane masar, så har ein jo lyst til å gjera seg ferdig med det ein held på med. Ein lyt ha litt forståing for kvarandre.
Samstundes, seier ho, er borna flinke når dei får beskjed om å ta skjermpause. Då er det gjerne hopping på trampoline eller fotball som fyller tida.
– Skjønar du noko av gaminga?
– Eg er med av og til, men eg får ikkje så mykje skryt. Det er moro å vera med, men eg er ikkje så interessert i å sitja aleine og øva, fortel ho.
