– Me og dei har ein jobb å gjera

Varaordførar Frode Nygård (Frp) meiner det er trist at det som har vist seg å vera ei effektiv behandlingsform, ikkje passar inn i systemet for offentlege helsetenester og dimed ikkje har oppnådd offentleg stønad frå andre enn Kvam herad enno.

Samstundes saknar han ein plan i søknaden om stønad frå kraftfondet for korleis selskapet skal koma i posisjon til å verta ein del av det offentlege behandlingstilbodet.

– Det er den vegen ein må gå om det skal vera liv laga. Ein kan ikkje driva det som prosjekt, sa Nygård då formannskapet 2. november drøfta søknaden om tre millionar kroner.

– Må løysa opp

Jostein Ljones (Sp) meiner det er politikarane som må arbeida for å løysa opp «det stive systemet». Om ikkje innovative tiltak som viser gode resultat, kan overleva, vert det vanskeleg, meiner han.

Han fekk støtte av ordførar Torgeir Næss (Ap), som meiner satsinga i Øystese er i ferd med å få ei god politisk forankring etter at ei rekkje stortingspolitikarar har fått omvising og informasjon i lokala.

– Både Helse i Hardanger og me har ein jobb vidare, sa Næss.

Nygård viste til at det ligg an til store nedskjeringar i Helse Vest. I ein slik situasjon kan det verta utfordrande å lyfta eit forskingsprosjekt, same kor godt det er, meiner han.

– Situasjonen bør gjera prosjektet meir aktuelt. Eg håpar ikkje Helse Vest kuttar innovasjonen, for han må til for å få ned kostnadene, sa Ljones.

– I grenseland?

Nygård spurde om det kan vera i grenseland å gje stønad til driftskostnader, ettersom kraftfondet har føringar som tilseier at pengane ikkje skal nyttast til drift – eller «brufinansiering», som det heiter i søknaden. Næss meiner søknaden er i grenseland til å vera i konflikt med føringane, men har tvila seg fram til at omgrepa «brufinansiering» eller «prosjektfinansiering» er tilstrekkeleg langt nok frå ordinær drift.

Rådmann Anita Hesthamar sa at ho meiner driftsstønaden går til eit utviklingsprosjekt og at det er lite truleg at nokon vil setja spørjeteikn ved det. Eventuelt må ein trekkja tilbake tilsegna og pengane seinare eller, om ikkje det er mogeleg, henta pengane frå ordinære driftskroner, meiner ho,

Kari Mostad (MDG) viste til at Hardanger og Voss museum tidlegare har fått stor fondsstønad til eit «signalprosjekt», og meiner helsesatsinga kan verta det same.

Heradsstyret tek avgjerd om dei mange kraftfondssøknadene 8. november. Formannskapet ville ikkje gjera store endringar i dei føreslegne avslaga og løyvingane, men i fleire saker vil gruppene vurdera endringar til tysdag. Sp tok til orde for å auka løyvingane i nokre saker.