– Me må visa at me vil

Slik vert det i alle fall om budsjettvedtaket til samarbeidspartia i Vestland fylkeskommune vert realisert. Der er det nemleg sett av 50 millionar kroner til vegprosjektet i Kvam komande år. I økonomiplanperioden er det sett av i alt 600 millionar.

Ikkje alle er overtydde om at det vert slik. Kåre Martin Kleppe (H) er mellom tvilarane, sjølv om han er samd i at Tokagjelet står for tur etter skredsikringa ved Heilevang mellom Askvoll og Førde.

– Det er i alle fall veldig optimistisk. Eg minner om at reguleringsplanen for Tokagjelet ikkje er ferdig, sa Kleppe då fylkestinget vedtok budsjettet for 2025–2028.

H hadde ikkje pengar til prosjektet i Kvam med i sitt budsjettframlegg. Kleppe meiner at både det prosjektet og tunnelen mellom Nordrepollen og Austrepollen må sjåast i samanheng med valet av trasé for «armen» frå europaveg 134 til Bergen.

– Me treng nokre avklaringar for å sjå kor stor den statlege delen av ei slik investering vil vera, sa han.

Han meiner det vil verta enklare for fylkespolitikarane å prioritera prosjektet om dei veit at det kjem pengar også frå staten.

– Meir sannsynleg?

Sigrid Brattabø Handegard (Sp) meiner H er for lite offensiv andsynes staten, og tok til orde for å setja i arbeid pengar som i dag står «på bok».

– Vil det ikkje vera større sannsyn for at staten vil vera med i eit spleiselag viss me viser at me vil det, at me har pengar og at me er utolmodige? spurde ho retorisk.

– Det er fint å leggja inn masse pengar når ein veit at det er urealistisk med oppstart, svara Kleppe, som åtvara mot å skapa grunnlause forventingar i folket.

Han sa at stortingspolitikarane kan koma til å vera nøgde med å sjå at fylkeskommunen sjølv ynskjer å realisera prosjektet med sine eigne pengar.

– Eg veit ikkje om det nødvendigvis er rett strategi, sa han.

Fekk kritikk

Bjarte Helland (INP) frå Kvam røysta for budsjettframlegget til Handegard og samarbeidspartia. Han argumenterte med at han sjølv brukar Tokagjelet og vegen mellom Jondal og Odda. Den grunngjevinga fekk han kritikk frå Trude Brosvik (KrF) for.

– Eg er glad for støtte til viktige skredsikringsprosjekt, men det blir litt spesielt om me som skal vareta heile Vestland, grunngjev det med at me sjølve køyrer den vegen. Me må kunna sjå heilskapen, sa ho,

– Ja, me skal sjå heilskapen. Men me har ein regional transportplan som prioriterer Tokagjelet. Det har ingenting med at eg bur i Hardanger å gjera. Det er ekstremt rasutsette vegar i Sogn og Fjordane. Diverre har eg ingen påverknad på dei sentrale som overfører midlar til vedlikehald og oppgradering av vegar, sa Helland.