— Me må gå i oss sjølve

Av innbyggjarane i Kvam er 11,2 prosent innvandrarar. Dei kjem frå 52 nasjonar. Kor mange av dei kjenner du?

Lisbeth Fredheim Oma (KrF) peika kanskje på elefanten i heradsstyresalen då ho oppmoda alle kvemmingar til å ta eit tak og gå i seg sjølve for å leita etter kva dei kan bidra med for å oppnå god integrering.

Det gjorde ho då strategiplanen for integrering stod på agendaen 15. februar, og i formannskapsmøtet veka før. Planen, som sanka eitt innspel frå ein innfødd kvemming i høyringa, vart samrøystes vedteken og hausta ros frå fleire parti.

— Be på kaffi!

Oma meiner det er fint at heradet lagar gode planar og legg til rette for integrering, men meiner det kan vera for lett å tenkja at når det er gjort og Grannehjelpa gjer så mykje bra.

— Det er viktig at kvar enkelt tenkjer: «Korleis kan eg bidra til at nye finn seg til rette?», sa ho.

Oma meiner kvemmingane bør oppsøkja dei nye naboane, be dei på kaffi, gå ein tur med dei eller gå på konsert. Mykje handlar om kva innstilling ein har, slik ho ser det.

— Eg vil påstå at eg har fått eit rikare og kanskje meir meiningsfylt liv etter at eg har fått veldig mange gode vener frå andre land og plassar, sa Oma.

— Har me lukkast?

Også Kari Mostad (MDG) meiner det sivile samfunnet må melda seg på. I tillegg framheva ho at planen vitnar om trongen for mellom anna betre tverrfagleg samarbeid og eit koordinerande organ som samordnar integreringskompetansen til ulike aktørar.

Geir Madsen (SV) viste til at Kvam har ein mindre del innvandrarar enn Vestland fylkeskommune, og meiner det er grunn til å setja spørjeteikn ved statistikken.

— Har me gått til god integrering? spurde Madsen, som meiner me kan gå glipp av gode ressursar og arbeidskraft om ikkje me lukkast.

Rådmann Anita Hesthamar opplyste i formannskapsmøtet om at det ikkje er avklara kven i heradet som skal koordinera integreringsarbeidet. Det har med ressurssituasjonen å gjera, ifylgje henne.

Lett og tungt

Gunnar Kvandal (Frp) meiner integrering er både enkelt og vanskeleg. Fyrste steg er å læra norsk, dinest kan ein forstå kulturen, resonnerte han.

Mostad meiner at Kvandal gjennom eit slikt resonnement legg for mykje av ansvaret på dei nye landsmennene og -kvinnene. Hennar tolking av utspelet er at fyrst kan dei læra språket og kulturen vår å kjenna, og så kan me vurdera å verta vener med dei. MDG-politikaren meiner ein like godt kan snu det på hovudet og bør hugsa at innvandrarane ei gåve til nordmenn som kan læra og forstå meir av dei.

Frode Nygård (Frp) er uroa over at mange innvandrarar hamnar i stillingar som ikkje krev høge kvalifikasjonar og som nordmenn gjerne ikkje ynskjer. Det skapar eit uheldig skilje, meiner han. Nygård har kjensla av at særleg det offentlege kunne strekt seg lenger for sysselsetja innvandrarar.

Ordførar Torgeir Næss (Ap) meiner planen har vorte betre etter høyringa, mellom anna som fylgje av det eine innspelet frå Beate Gauden. Særleg framheva han at heradet skal kontrollera om planen har nokon effekt.

Då Kvam herad skipa til eit ope møte om planen i november, møtte tre personar opp i tillegg til tre kommunale byråkratar. Alle var nordmenn, opplyser sakshandsamar Jon Nedkvitne til HF.